Problema cu tiramento di cacho den Bacobastraat

Diahuebs merdia, Central a dirigi patruya den Bacobastraat, den vecindario di YMCA pa un situacion sospechoso, caminda cu e homber H lo a tira un cacho cu un pistol di aire. Central a sigui indica cu H tabata den su auto preto den dicho vecindario. Eynan na e sitio, polis a bin topa cu un auto di carga, posiblemente di e marca Daewoo y di modelo Damas, para dilanti un cas den Bacobastraat. Parce cu H ta biba den e cas. El a sali pafo y a declara cu e tin molester cu tur e cachonan di e bario rond di su cas, ta laga sushi atras.
E ta sigui conta cu varios biaha el a papia cu e bisiñanan riba nan cacho cu ta cana riba caminda. El a declara cu berdad cu el a tira un cacho bruin licht cu un pistol di aire y cu esaki a core bay den direccion pariba. El a sigui bisa cu e no sa di ken e cacho ta. A puntre pa mustra e arma, cual el a haci tambe. E arma no tabata paketa. H. a wordo atendi. El a declara cu e arma no ta di dje y cu e no tin un permiso pa carga esaki. E arma a wordo confisca. Central a wordo poni na altura.

Comments

comments