Expertonan ta calcula cu e tormenta tropical Sam, e di diesocho tormenta cu nomber di e temporada lo por tin forsa di horcan pa diabierna. Y e por ta un horcan importante cu bientonan maximo di 111 mph pa dialuna anochi, segun informe di Centro Nacional di Horcan.
Sam a forma diabierna como depresion tropical no. 18 y tabata move west na 16 mph cu bientonan máximo di 50 mph, pa 11’or di diahuebs mainta. E tabata na 1.745 miya oost-zuidoost di e limite unda Oceano Atlantico ta topa cu e extremo oost di lama Caribe. E pronostico ta cu e ta move west-noordwest diabierna.
E lo move hopi mas poco-poco durante fin di siman mientras cu e ta alcansa forsa di un horcan, asina meteorologonan a bisa. Si su bientonan maximo sosteni yega 115 MPH, manera e pronostico ta, e lo tin forsa di un horcan categoria 3, loke ta hacie e di cuatro horcan mas importante di 2021.
Ta mucho tempran pa bisa unda e lo por bay, pero e proximo dianan por ta crucial pa pronostica su caminda. Un tormenta hopi lihe den su desaroyo ta aumenta e chens cu e no ta yega area di Florida.
E nombernan di tormenta cu a resta pa temporada 2021 ta: Teresa, Victor y Wanda, faltando dos luna pa e temporada finalisa.
Si keda sin nomber pa tormenta, esnan di final di temporada ya lo no tin nombernan manera Zeta y Theta, cu a uza aña pasa. Na su luga, e expertonan a opta oa uza un lista di nomber propio y esakinan ta: Adria, Braylen, Caridad, Deshawn, Emery, Foster, Gemma y Heath.
Ya caba a forma 18 tormenta cu nomber, seis horcan y tres horcan importante.