TOKIO, Japon- Bou di un shelo blauw, como 1000 persona tabata t’ey na e Santuario Meiji na Tokio, pa asina presencia e casamento di Prinses Ayako di Japon y su bruidegom Kei Moriya.
Momento cu e pareha a drenta e santuario, e publico a grita palabranan di pabien na e pareha, cu e palabra Japones “Banzai”, cual kier un deseo di felicidad y amor eterno na e pareha. Famianan mas cerca y amistadnan a ricibi e bruid y e bruidegom na momento cu nan a drenta den e sala di ceremonia.
Prinses Ayako tabata bisti den un uchiki kimono color geel cla, cu flor roos y blachinan berde borda ariba esaki y un hakama (carson cu pia hancho cu ta yega te na e enkel) color biña skur. E tabata tin tambe den su man un fan traha di cypress Japones, tambe yama hiougi. Moriya tabata bisti den un atuendo mas occidental, cu su bachi preto, carson strepia shinishi y un sombre di seda cu tabata pertenece na e tata di Ayako, Prins Takamodo, d.f.m.
E kimono di Ayako ta similar den estilo y diseño cu esun cu su ruman, prinses Noriko a bisti ora cu el a casa cu Kunimaro Senge na 2014.
Prinses Ayako di 28 aña, ta e yiu mas chikito di Prinses Hisako y defunto Prins Takamodo, primo di emperador Akihito. Segun ley imperial Japones, miembronan femenino di famia real Japones ta perde nan titulo, status y zakgeld si nan kies pa casa cu’n persona cu no ta procedente di realesa of aritrocracia. Pero esaki no ta conta pa e miembronan masculino di e famia real.
Door di casa cu Moriya di 32 aña, kende ta un empleado di e compania di carga Nippon Yusen KK , e prinses ta renuncia na su titulo real y ta ricibi un lump sum di 950 mil dollar for di gobierno Japones pa su gastonan diario.
Prome cu e comienso di e ceremonia, Ayako a cambia su kimono den un tunica mas formal cu’n estilo Shinti. El a bisti un kouchiki cora, un capa “chikito” cu manga largo y hanco, y un saya largo color maron yama naga-bakama.
E ceremonia mes tabata algo mas priva, cu a conta cu presencia di solamente famianan mas cerca. Paden, e pareha lo a haci varios ritual cu ta marca un matrimonio den estilo Shinto, incluyendo e intercambio di copanan nupcial y presentando un taki di Tamagushi bendiciona como ofrenda. E recien casanan a intercambia nan votonan matrimonial y como tambe e renchi.
Despues di esaki, e pareha a sali for di e santuario como pareha casa.
For di un edad hopi jong, Ayako a bisa cu el a wordo siña cu su nacemento den un famia di realisa ta nifica cu su obligacion tabata di apoya e emperador y e emperatriz. “Mi a bandona e famia imperial awo, pero mi obligacion den apoyo di su mahestadnan lo keda mescos.
E santuario caminda cu e ceremonia a tuma luga ta di importancia simbolico grandi. Inaugura na 1920, e Santuario Meiji ta dedica na e Ayako su tatara welo Emperador Meiji y su casa, Emperatriz Shoken.
E matromonio di Asako y su consecuenta renuncia na obligacionnan real ta bin den temponan di prueba hopi dificil pa e monarkia mas bieu na mundo. E Emperador stima pa su pueblo, Akihitio a anuncia cu e lo abdica na fabor di su yiu homber pa Prins Heredero Naruhito, dia 30 di april, 2019. Ley imperial ta indica cu e corono mester wordo pasa pa herederonan homber, y Naruhito tin solamente un yiu homber di 12 aña, Prins Hisahito lo ta e unico cu lo mester carga e responsabilidad pa sigui cu e liña real.
E abdicacion y e proximo matrimonio di su nieta prinses Mako a resurgi e debate di e rol di hende muhe den e realesa Japones y si lo mester cambia e ley imperial pa asina duna derecho na e hende muhe pa tambe hereda e trono.