Sr. Armand Hessels di Fundacion Gobernacion di Calidad Aruba ta splica con cos a bay despues cu nan a sali na 2016 riba e tema politico despues di a saca un rapport.
E fundacion a lanta na Februari 2016. E tempo ey a tene un rueda di prensa pa informa comunidad di e fundacion y nan metanan. Durante aña a haci cierto cantidad di trabao, a busca contacto cu gremio comercial, sindical, nan a papia cu e organisacion di NGO’s. Tambe a papia cu lidernan di Fraccion cu ta representa pueblo den Parlamento, y tambe cu Gobernador.
Asina tambe nan a cera conoci cu tur organisacion cu tin di haber cu maneho na Aruba. Y di nan parti nan a por a cera conoci cu e fundacion. Na comienso e recepcion tabata hopi positivo. Pero esaki a cambia un tiki ora a saca e prome rapport, tocante maneho di personal na Aruba, den 30 aña despues di Status Aparte. Despues di esaki, a bira dificil pa haya un reunion cu e gremionan aki.
Loke a resalta, cu e tema aki ta un tema hopi sensitivo, no solamente pa partidonan politico, pero tambe pa otro organisacion cu tabata tin e posibilidad pa trece esaki dilanti. A wordo adverti door di Camara di Comercio, door di ATIA, pero no suficiente pa cambia e maneho di gobierno.
Un di e problemanan cu ta causando problemanan financiero na Aruba, ta hustamente ta e parti di personal. Den tur rapport, no solamente CAFT, cu tin hopi mas atencion cu e otronan, pero tambe rapport di Controlaria General, cu continuamente ta adverti contra esaki. Esaki ta un peso hopi grandi riba presupuesto di gobierno, cu hopi otro necesidad cu Aruba mester cumpli cun’e, manera desaroyo den enseñansa, siguridad, asuntonan social no por tuma luga pa motibo di e placa cu ta wordo comi, door di e aparato demasiado grandi di aparato gubernamental.
Partidonan politico ta tilda e otro, cu no ta den gobierno, a causa tur e malestar. Pero den e rapport cu e fundacion a compila, por wak exactamente e aporte di cada partido, cuanto e aparato gubernamental a costa. Esey ta sin conta, pa duna un ehempel, hendenan cu nan mester a reemplasa door cu esakinan a baha cu pensioen.
Esaki no ta pasa solamente den e aparato gubernamental, pero tambe di e parti subsidia. Ta conoci den cua tempo di gobernacion, esaki a tuma luga. Ningun partido politico no por exclui su mes di e malestar aki. E situacion aki lo mester wordo coregi, mas pronto posibel, sino e situacion financiero di Aruba lo sigui empeora. Awor caba e situacion ta bastante malo, segun Sr. Hessels.
No tin un ley bon defini pa bon gobernacion, pero tin normanan internacional. Hasta na Aruba, e normanan aki a wordo compila door di mr. Mito Croes, d.f.m. El a pone e normanan di bon gobernacion bou di otro , den e rapport Calidad. E rapport ta asina bon, cu hasta partido MEP a bay di acuerdo cu e principionan. E rapport aki ta uno di hopi bon calidad.
Lamentablemente, hasta esunnan cu es tempo ey a aplaudi e rapport aki, awendia ta viola contra tur e principionan di bon gobernacion cu e rapport ey. E indicacion di con pa hiba un gobierno drechi, tur partido envolvi, ta violando. Fundacion Gobernacion di Calidad, constistiendo di Sr. Leo Maduro, secretario di e Fundacion y Sr. Servito Thijsen, tesorero, hunto cu Sr. Armand Hessels ta sumamente preocupa pa e rumbo cu Aruba ta tumando.
Den partidonan politico no tin interes pa hiba un bon gobernacion. Tur ta papia di bon gobernacion, sin dun’e contenido.
Fundacion Bon Gobernacion ta purba di dun’e contenido y no fiha solamente riba parti di mal gobernacion. Pero den e dianan venidero, e fundacion lo trece dilanti puntonan cu lo dicidi si e pais ta wordo goberna ariba principio di bon gobernacion.