Prijsnan di consumido ta sigui subi na Boneiro

Boneiro: Den e di kuater kuartal di 2019 e preisnan di konsumidó na Boneiru tabata 2,2 porshento mas haltu ku un aña anterior. Den e kuartal anterior subida di preis di merkansia i servisio tabata ainda 1,2 porshento. Na Sint Eustatius preisnan a subi riba base anual ku 1,0 porshento i na Saba ku 0,8 porshento. CBS ta anunsiá esaki a base di e índise di preis di konsumidó (CPI).

Partikularmente e desaroyo di preis di transporte a okashoná e subida di e nivel di preis promedio pa merkansia i servisio na Boneiru den e di kuater kuartal di 2019. Gasolin tabata kasi 10 porshento mas karu den e kuartal pasá ku un aña anterior i di disel mas di 11 porshento. Fruta tambe a hisa e nivel di preis i tabata kasi 39 porshento mas karu ku un aña anterior. E desaroyo di preis di paña i sapatu al kontrario tabatin un efekto di bahada riba e desaroyo di preisnan di konsumidó.

Preisnan na Sint Eustatius 1,0 porshento mas haltu
Na Sint Eustatius e di kuater kuartal di 2019 tabata promedio 1,0 porshento mas karu pa e konsumidónan kompará ku un aña anterior. Den e di tres kuartal di 2019 esaki ainda tabata 0,7 porshento. Partikularmente e desaroyo di preis di produktonan di kuminda i bibidanan sin alkohòl tabatin komo efekto ku e preisnan di konsumidó a subi. Por ehèmpel preis di fruta a subi ku kasi 4 porshento kompará ku un aña anterior. Banda di esei preis di pasashi ku avion tambe a subi. E desaroyo di preis di paña i sapatu, meskos ku na Boneiru, tabatin al kontrario un efekto di bahada riba e desaroyo di preisnan di konsumidó.

Subida mas haltu di preisnan di konsumidó na Saba
Na Saba e preisnan di konsumidó tabata 0,8 porshento mas haltu ku un aña anterior; den e di tres kuartal di 2019 esaki tabata 0,3 porshento. E preisnan a subi mas fuerte pa motibu di e desaroyo di preis di telefonia i internèt. Banda di esei preis di servisio di seguro i artíkulonan di paña pa kas a subi. Kontrali e desaroyo di preis di paña i sapatu, na Saba tambe, tabatin un efekto di bahada riba desaroyo di preisnan di konsumidó.

Desaroyo di preis promedio 2019
Den henter 2019 e nivel di preis promedio na Boneiru tabata 1,3 porshento mas haltu ku den 2018. Na Sint Eustatius e preisnan tabata 0,7 mas haltu i na Saba 0,5 porshento mas haltu.

Sifranan tentativo
E sifranan tokante e di kuater kuartal di 2019 ta tentativo i lo ahustá nan na momentu di hasi publikashon tokante e promé kuartal di 2020.

Fuente: StatLine: Caribisch Nederland

Comments

comments