Prijs di petroleo Brent ta baha bou di 65 dollar

LONDON, Gran Bretania – E futuro di petroleo Brent pa entrega na januari 2019 a baha bou di 65 dollar riba e bolsa di balor di London, ICE Futures, cerrando diamars, marcando 64.98 dollar pa bari.
Mas laat, na final di e dia, e prijs a crece te yega 65,47 dollar pa bari.
E ultimo biaha cu e prijs di Brent a baha bou di 65 dollar tabata dia 16 di maart di e aña aki. Na november 12, un bari di Brent tabata costa 70 dollar.
Analistanan ta vincula e caida di e prijs petrolero riba e bolsanan mundial cu e preocupacion riba e exceso di oferta, segun The Wall Street Journal. Diamars, e Organisacion di Paisnan Exportado di Petroleo (OPEP) a baha su pronosticonan riba e crecemento di e demanda pa e aña aki y na 2018, señalando cu e ta bou di loke Asia y Medio Oriente ta spera.
Na october, e produccion di e miembronan di OPEP a aumenta na 127 mil bari diario. Rusia a aumenta su produccion na 50 mil bari pa dia, mientras cu Iran a baha su produccion na 156 mil bari diario.
Den su informe mensual, OPEP a menciona tambe e incertidumbre tocante e desaroyo di e economia global y a pronostica un crecemento di suministro di petroleo for di paisnan cu no ta forma parti di e organisacion.
Ademas, dialuna presidente Mericano, Donald Trump a afirma den un tweet cu “e prijs di petroleo mester ta hopi mas abao mirando e oferta”. Den e sentido aki, el a expresa e speransa di cu Arabia Saudita y OPEP lo no baha nan produccion. Su comentario a bin despues di cu Riad a anuncia cu e tin planea pa reduci su exportacion di petroleo pa asina his a e prijs y evita un exceso di oferta.

Comments

comments