Prijs di petroleo a baha diahuebs despues cu Angola a bisa cu lo bandona e Organisacion di e Paisnan exportado di Petroleo (OPEC), treciendo duda riba e esfuerso di e grupo di productor pa sostene e prijsnan limitando e suministronan global.
Futuro di crudo Brent a baha cu 31 cen na 79,39 dollar pa bari. Futuro di crudo West Texas intermediate a cay cu 33 cen, na 73,89 dollar pa bari.
Na prome ora di e sesion, ambos referencia a baha mas cu un dollar despues cu Angola a dicidi cu e tabatin pensa di bandona e grupo.
E minister Angoles di Petroleo, Diamantino Azevedo, a declara cu e pertenencia di su pais na OPEC no a sirbi su interesnan. Den e ultimo lunanan, e grupo di productor lidera pa Saudi Arabia a obtene sosten pa profundisa den e recortenan di produccion y impulsa e prijsnan di petroleo.
“Parce cu OPEC ta perdiendo e bataya pa mantene e prijsnan halto,” Matt Smith di e compania di siguimento di transporte maritimo Kpler, señalando cu e productornan no perteneciente na OPEC, manera Merca, a dal un paso padilanti pa yena e bashi di suministro.
Angola ta produci cerca di 1,1 miyon bari diario (bpd) compara cu e 28 miyon di bpd di henter e grupo.
Salida di e pais ta trece pregunta riba e cohesion y e direccion di OPEC, a pesar cu ta un di e productornan mas chikito y su marcha por tin impacto limita den e suministronan mundial, Smith a bisa.
Den un reunion cu a tuma luga na november, Angola a protesta contra e decision di OPEC di recorta su cuota di produccion pa 2024 cu e fin di yuda na alsa e prijs di petroleo.
Di un otro banda, e Administracion di Informacion di Energia di Merca (EIA) a bisa cu e produccion di crudo di Merca a subi na un record di 13,3 miyon bari pa dia (bpd) siman pasa, riba e maximo historico anterior di 13,2 miyon bari pa dia.
“Merca ta preparando pa aumenta e produccion n’e boca di Permico y den henter e pais,” Tim Snyder, economista di Matador Economics na Dallas, a bisa.
“Nos a mitiga e riesgo di e prijsnan aki na Merca y realmente nos a pone e Ruso y e Saudinan contra muraya,” Snyder a bisa.
E reciente atakenan cu a tuma luga como sosten di e Palestinonan p’e grupo militante Yemeni Houthi contra e bapornan cu tabata dirigi n’e wafnan Israeli, a obliga e transportistanan principal maritimo na mantene aleha di Lama Cora, causando interupcion den e comercio mundial.
“Cu un carga asina pisa di crudo Mericano reporta den e mayor medida, solamente por a supone cu e mercado lo a mantene inkieto pa loke ta e desviacion di e suministro of hasta e interupcion causa p’e atakenan Houthi na transporte maritimo,” John Evans, analista di PVM, a bisa.
E conflicto entre Israel y Hamas a intensifica diahuebs memey di e combersacionnan pa un tregua.
