Despues di un paar di dia di awasero, solo a sali cu lo trece e dolor di cabes cu sangura. Pa preveni esaki, MASNOTICIA a combersa cu Departamento di Salud Publico (DVG) pa loke ta nan punto di bista pa cu prevencion di casonan di virusnan na Aruba. Sra. Jurette Croes, di Departamento di Salud Publico (DVG) ta amplia.
Departamento di Salud Publico a tene un rueda di prensa, unda cu a haci un yamado na sector hotelero, sector comercial y scolnan, dus comunidad completo pa tuma accion y yuda preveni malesanan transmiti pa e sangura, manera dengue, zika y chikinguya. Despues di un par di dia di yobida, awo cu solo a sali, ta net e chens pa sanguranan broei. Esaki ta trece cuné, cu ora e cantidad di sanguranan subi, e cantidad di malesanan tambe ta subi.
Aruba a yega di pasa den epidemia di dengue y tambe di epidemia di zika, y lo no kier pa esaki ripiti. Un epidemia no ta sano pa nos comunidad y tampoco pa e sector di turismo. GKMB ta sigui cu nan trabaonan, di pasa cas pa cas, conscientisa comunidad, yuda e doñonan di cas pa reconoce e criaderonan. Pero GKMB su so no por haci e trabao su so.
Ta pidi pa e doñonan di cas, tur siman cana rond di cas, wak e awanan cu ta para, bolter esakinan, tiranan afo. Si e persona ta un persona cu ta wanta awa pa muha mata, por acerca GKMB pa haya conseho pa con pa cuida e awa pa e sangura no drenta den dje. Ta bon tambe pa aclarea cu spuitmento ta e ultimo recurso cu tin, dus spuitmento lo no sosode ki ora cu ta. Na momento cu ta spuit, no ta matando solament e sanguranan adulto cu ta bulando, pero e criadero mes ta keda. Ta keda na comunidad pa check den su vecindario, na cas, trabao, scol pa si wak un criadero, pa deshaci di esaki.
Despues di e temporada aki ta cuminsa sinti dolor di wowo, dolor di curpa, rash. Ta bon pa si esaki sosode, pa acudi na dokter di cas, ya cu e por ta un malesa transmiti pa sangura. Ta importante pa e cuida su curpa, pa keda cas pa evita cu otro sangura of mas sangura por pikanan.
Loke ta trata e sistema medico, dokternan tin e obligacion cu nan topa cu casonan di dengue of chikinguya pa meld esaki na Departamento di Salud Publico y GKMB lo asisti na e casnan cu a test positivo. Lo check den bario pa cualkier criadero. Si tin un caso sospechoso mes, Departamento di Salud Publico lo wordo poni na altura.
Na Aruba no ta tur hende ta consciente di e situacion aki. Na Aruba tin varios bario cu tin bariowatch, y ta pidi pa manda esaki den e bariowatch. Bisiñanan mester comunica cu otro, tene e bario limpi. Y den caso cu keda cu molester, por yama GKMB pa bin tira un spotcheck pa wak kico tin den bario cu por causa molester.
Por ultimo, den cualkier caso di molester extra di sangura, ta bon pa tira un check up pa ta sigur cu e brote di sangura no ta na nan cas, pero si den e bario, nan por yama GKMB pa bay tira un bista. A haci un suplica tambe na e tireshopnan, pa nan tene rond di nan luga limpi, ya cu e tirenan ta conoci pa ta criadero di sangura.
Prevencion di dengue, zika y chikinguya ta keda un tarea di nos tur.