Parlamentario di fraccion di AVP, drs. Mervin Wyatt-Ras, ta trese padilanti cu e presupuesto supletorio 2017 no por a ser sosteni dor di fraccion di AVP paso el a ser di tal forma cambia dor di gobierno cu no por a reconoce. Sinembargo el a ser aproba dor di e stempelparlement di coalicion.
Wyatt-Ras ta menciona cu e presupuesto supletorio a ser traha dor di gobierno anterior. Sinembargo e gobierno aki a tarda asina hopi pa present’e y a present’e cu un cambio asina drastico cu ni por a reconoce. Anto contrario na loke e ministernan di awe a grita ora nan tabata parlamentario no a ni manda e cambionan drastico aki pa un tweede toetsing pa Raad van Advies ni a mand’e pa CAFT. Awe si minFIn ta bisa cu no mester manda nada bek Raad van Advies.
Segun gobierno su parlamentarionan e deficit a subi drastico. A papia hasta di disaster. Den caso cu tin un deficit asina halto manera cu e gobierno actua ta pretende, ta di spera cu e gobierno aki lo mester tin solamente 7 minister envez di 8 of 9. Wyat-Ras ta keda pendiente di e cambio aki.
Wyatt-Ras ta haya ademas cu banda di e presupuesto suppletorio gobierno lo mester a cumpli cu ley y entrega e presupuesto di anja 2018 y e LIM promer cu fin di anja pa asina stipula ken lo ta na encargo di cual ministerio y pa fiha metanan concreto di gobernacion.
Wyatt-Ras a cuestiona alavez cu e minister di Asuntonan Social ta anuncia cu e lo paga Kerstbonus pa esnan cu ta cobra bijstand mientras esaki no ta algo nobo y cu ta netamente gobierno di gabinete Mike Eman a yuda e sector social dor di entre otro aumenta bijstand, introduci schoolkinderen toeslag y hisa e suma di uitkering pa esnan special.
E deficit di AZV tambe a keda sin claridad riba dje a base di ki rapport of carta lo mester pone un suma mas halto. Ademas tambe ta skohe pa bai drecha edificio di gobernacion envez di pone e suma aki pa por ehempel fundacionnan ya cu a anuncia cu lo bai fortifica e ser humano. Tin mas aspecto y otro coleganan cu a hiba palabra a trese varios punto padilanti manera CITGO y tambe e aspecto di impuesto. Locual por a nota durante reunion tabata un cantidad di coordinadornan di ministernan cu tabata eynan pa grita, insulta y bully parlamentarionan di AVP sin cu e presidente tabata tribi di stop nan. Lo mester check unda e personanan aki ta traha cu nan por keda asina tanto ora for di nan trabou pa fungi como cheerleaders pa gobierno.