Presupuesto 2017 a keda entrega na Parlamento

Pa prome biaha den historia diaranson atardi Gobierno a entrega un presupuesto completo na presidente di Parlamento. Ta trata aki di e presupuesto di Pais Aruba pa aña 2017 hunto cu otro presupuestonan manera di Raad van Advies, DOW y TPF. “E presupuestonan chikito aki cu den pasado hopi biaha a keda entrega laat, e biaha aki a wordo entrega tur hunto y esey ta duna mi un sentimento di satisfaccion hopi grandi”, asina Minister Bermudez a expresa despues di e reunion cu Presidente di Parlamento.
Segun Minister di Finanzas pa basta luna caba ta trahando riba e presupuesto aki y sigur durante e ultimo simannan e trabou a bira mas intensivo. “P’ami tambe e tabata hopi importante pa demostra cueste loke cueste cu nos por haci esaki ya cu den e ultimo decadanan esaki no tabata sosode. Mi ta hopi contento y satisfecho cu nos a logra”, asina e mandatario a bisa.
Diaranson Gobierno a bira doño di su propio refineria, ademas tin otro desaroyonan importante tambe cu ta tumando luga actualmente cu CITGO, esaki sigur ta hopi importante pa tene na cuenta ora ta trata e presupuesto di Pais Aruba. Segun splicacion di Minister Bermudez, asina cu e actividadnan aki inicia, lo tin un bista mas concreto riba e efecto cu esaki ta trece cu n’e, con e ta afecta nos economia y e entradanan di Gobierno.
Na mes momento ora cu lo trata e presupuesto di 2017 den Parlamento prome cu fin di aña, e mandatario a indica cu tambe lo entrega un nota di cambio pa actualisa e presupuesto di aña 2017 y percura cu esaki tambe ta al caso y actualisa.
Consecuentemente e aña aki ainda lo entrega un presupuesto supletorio pa ahusta y actualisa e presupuesto actual di aña 2016 pa inclui e efecto di rehabilitacion di e refineria. Mientras tanto Parlamento lo tuma e debido tempo pa asina studia e contenido di e presupuesto 2017, haci pregunta y asigna un fecha pa su tratamento den un reunion publico.
Minister Bermudez ta gradici tur esunnan cu a comparti y contribui den e esfuerso colectivo aki. Specialmente na nos Gobernador, sr. Fredis Refunjol cu na un forma diligente a procesa e presupuestonan y a haci cu nan por a keda entrega na tempo.

Comments

comments