Presidente nobo di AVB: Infrastructura di clubnan tambe mester mehora awo

Randolf Lacle, inmediatamente despues cu el a wordo eligi president di Arubaanse Voetbal Bond (AVB), a pone man na obra y a cuminsa traha.

Su prome prioridad tabata encuentro cu personal di AVB, miembronan di su directiva, pero tambe e tabatin comunicacion cu FIFA y encuentro cu representante di CONCACAF. Tur esaki el a conta den entrevista basta amplio cu Carmichael Bikker. “Tur trabou ta keda mescos, pasobra ta pa futbol nos ta traha,” el a bisa.

Ainda ta trahando si riba e aspecto di administracion, cambionan cu mester wordo haci, mester pone su mes na altura di tur loke ta pendiente.

Tambe el a papia di su preocupacion, unda futbol a bay hopi dilanti, pero e infrastructura di Aruba en general y di e clubnan a keda hopi atras. E ta consciente cu e norma di aki 10 pa 15 aña ta cu cada club mester tin su veld cu yerba artificial. Corsou a cana e caminda parcialmente caba. Pa e cambio, e lo cuminsa reuni cu e clubnan, pero prome cu esey e lo toca e tema ey cu CONCACAF y FIFA y despues lo bay mesa cu e clubnan riba e tema aki.

El a sigura tambe cu e tin su pensamento pa loke ta e structura di campeonato di Aruba, pero esey ta un pensamento personal. E ta  kere den un sistema cu ta hacie mas atractivo, algo cu ta genera fondo pa e clubnan y den exterior tin diferente bon ehempel. Cualkier cambio cu mester  bini riba e tereno aki lo ta den dialogo cu tur e clubnan miembro. Pero si el a bisa di ta admira e sistema Mexicano, unda cu tin un torneo di apertura y otro di clausura, pues dos final den un aña. E clubnan Mexicano ta domina den CONCACAF y nan futbol a crece. “Mi no por compara Aruba cu Mexico, pero por wak si e filosofia ta funciona na Aruba.”

Futbol LIFIDA y Damas tin su atencion y e ta kere cu e ta mira cosnan pa futbol femenino den futuro. LIFIDA e desaroyo ta importante, su formacion y esey lo bay traha riba dje, pa produci hungadonan di futuro. Pa esaki un bon structura ta necesario.

 

Comments

comments