WASHINGTON, D.C., Merca- Presidente di Merca, Donald Trump, diasabra a bisa di cu “esaki ta un bon momento” pa cierre di su gobierno, si e no haya e fondonan pa construi e muraya na e frontera cu Mexico.
“Nos ta papiando tocante e muraya na e frontera, nso ta papiando di un suma grandi di placa, casi 5 biyon dollar”, e mandatario a indica den declaracionnan duna na periodistanan prome cu su salida pa California pa comproba e situacion di e candela.
Trump a menciona e caravana di migrantenan Centroamericano cu ta pretende di crusa e frontera Mericano desde Mexico, “si bo wak e caos, si bo wak e cantidad di hende cu ta na caminda”, segun e agencia EFE.
“Esaki lo ta un bon momento pa un “shutdown”. Mi no ta kere cu ta necesario ya cu mi ta pensa cu e democratanan lo compronde y si nan no compronde, nos lo sigui pa gana eleccion. Manera boso sa, nos a gana Senado”, el a señala.
Ta spera cu Trump, a trabes di e legisladonan Republicano, purba inclui fondonan pa e muraya fronteriso cu Mexico den e presupuesto federal cu congreso lo mester debati dia 7 di december proximo.
Den caso cu no yega na un consenso, Trump lo por forsa un cierre di Administracion, segun medionan local.
E lider di e mayoria Republicano den Senado, Mitch McConnel, a ripita na varios ocasion cu e lo kier haya e 5 biyon dollar pa construccion di e muraya, aunke ta poco probabel cu e democratanan apoya e decision aki.