BRASILIA, Brazil- E Tribunal Supremo Federal di Brasil diaranson a rechasa e recurso presenta pa e ex presidente Luiz Inacio Lula da Silva, pa evita di bay prizon. Esaki ta bin despues di cu Lula a wordo sentencia na 12 aña di prizon pa corupcion pasivo, locual ta pone e ex mandatario na algun dia leu pa bay prizon.
E decision di e Supremo ta un golpi pa e partido di Trahadonan (PT), debi cu Lula ta aparece como faborito pa e proximo eleccionnan presidencial cu lo tuma luga na October.
E Supremo Tribunal Federal (STF) a tuma e decision aki pa un mayoria chikito di 6 voto na fabor y 5 contra, despues di mei anochi diaranson, despues di e a debati pa mas di 10 hora.
Según huristanan, Lula por wordo deteni otro siman, ora cu e tribunal di segundo instancia na januari cu a conden’e analisa e ultimo obheccionnan di su defensa, según e agencia di noticia AFP.
E peticion di habeas corpus a bin den respuesta na e fayo di e Tribunal Regional Federal di e di Cuater Region (TRF4), cu dia 24 januari a ratifica e sentencia di e hues Sergio Moro, cu ta investiga Lula den marco di e Operacion Lava Jato.
Na januari ultimo Lula da Silva a wordo condena pa un tribunal di apelacion na 12 aña y un luna di prizon pa a ricibi un apartamento di un compania di construccion involucra den e escandalo di soborno di Petrobras.