MANILA, Filipinas- E presidente di Filipinas, Rodrigo Duterte, a menasa di aresta e fiscal general di e Corte Penal Internacional (CPI), Fatou Bensouda, si e sigui tene actividadnan den su pais, argumentando cu CPI no tin derecho di investiga riba suelo Filipino, debi cu Manila ya no ta miembro di e Tribunal.
“Cua ta bo autoridad awo? Si nos no ta miembro di e tratado, pakico bo ta sigui den e pais aki?”, e mandatario a expresa referiendo su mes na e abogado Gambinio durante un conferencia di prensa. “Bo no por eherce niun di bo procedimentonan sin un base. Esey ta ilegal y mi lo manda aresta bo”, el a agrega, segun The Manila Times.
Na Februari, CPI a dicidi di haci un examen preliminar tocante Filipinas, pa supuesto crimennan internacional liga na e polemico guera contra droga di Duterte, cual, segun Amnesty International, ya caba mas di 7 mil persona a perde nan vida den solamente shete luna di su mandato, cu a cuminsa na 2016.
Na maart, despues cu e alto comisionado di UN pa Derechonan Humano, Zeid Ra’ad al Hussein, a afirma cu Duterte mester di un “evaluacion psikiatrico”, presidente Filipino a anuncia su retiro di CPI. No obstante, e Statuut di Roma, instrumento constitutivo di e Corte Internacional, ta stipula cu e retiro di un estado miembro por ta efectivo te despues di un aña cu e secretario general di UN a ricibi e notificacion por escrito.
Fuente: