WASHINGTON D.C., Merca – Despues di un eleccion, un presidente electo tin un enorme cantidad di trabao pa haci. E periodo entre e Dia di Eleccion y Dia di Inauguracion ta bula, y un lider entrante tin cu arma un ekipo, ricibi informacion riba maneho, hinca un agenda den otro y atende un sin fin di cantidad di reunion.
Den e caso di Donald Trump, tin un otro parti di su calender di evento cu mayoria di e presidentenan electo no tin cu preocupa cune, pasobra e mayoria di e presidentenan electo no a wordo acusa di comete fraude. E corant Politico a informa ayera: Prome cu Donald Trump lanta su man drechi pa huramenta di tuma e encargo na Januari, e tin haci un otro huramentacion: e tin cu para den corte den su propio defensa durante un huicio civil den corte federal riba un supuesto fraude pa loke ta su programa di seminario di Real Estate di Trump University.
Trump ta enfrenta un prueba duro legal, caminda ningun otro presidente electo a yega di haya su mes aden: aki e lo purba di defende su mes dilanti un hurado cu ta prepara pa e retonan grandi di un politico novato cu lo enfrenta ora cu e asumi e presidencia.
E votadornan Mericano parce di no ta worry cu e supuesto eskema fraudulento di e Universidad di Trump, pero e presidente electo ta para acusa di a dirigi un estafa mahos, estafando cliente/studiantenan di basta placa. Hopi di e victimanan di e presunto estafa di Trump a presenta un demanda y e seleccion di hurado lo ta premira pa cuminsa dia 28 di November na San Diego.
E Republicano lo ta e prome presidente electo pa defende su mes den corte prome cu su inauguracion. E hues di districto Gonzalo Curiel, kende tabata blanco di atakenan racista for di Trump durante e campaña, lo supervisa e procedimentonan.
Haciendo cosnan pio pa e presidente entrante, esaki no ta solamente e unico caso relata na Trump cu tin cu tira un bista riba dje.
E dudoso operacion di “Trump University”, no solamente ta enfrentando un caso civil; e tambe ta bao di investigacion di e oficina di fiscal general di New York. E sospechoso fundacion caritativo di Trump, cu tambe a wordo acusa di ta fraudulento, tambe ta enfretando escrutinio legal.
Loke ta mas, FBI a mira e lasonan di campaña di Trump na funcionarionan Ruso – esey a tuma luga un tiki mas laat di awe mainta – y manera USA Today a informa recientemente, literalmente demandanan pendiente cu ta rondona Trump y su empresanan comercial cu no lo bay djis pasobra e Mericanonan a eligi’e.
Trump ta enfrentando litigacionnan significante mara na su negoshinan: miembronan rabia na su campo di golf na Jupiter, Florida, caminda cu nan ta bisa cu nan a wordo horta for di nan restitucion di nan obligacinnan y un ex empleado na e mesun club, a haci keho cu el a wordo kita for di trabao despues di a reporta acoso sexual… Trump tambe ta defendiendo demandanan mara na su campaña. Un consultor politico a demanda $4 miyon bisando cu Trump a difam’e. Den un otro caso, un accion di clase, ta bisa cu e campaña a viola leynan di proteccion di consumidor door di manda mensahenan di texto no solicita.
Si e wordo eligi, e demandanan habri lo sigui Trump. E no lo tin derecho na inmunidad y e por wordo obliga pa duna declaracion of hasta testifica den un audiencia publico. Esey por come tempo y expone un letania di relacionnan priva y di negoshi incomodo na publico.
Nota, ningun di e casonan aki ta inclui e casonan cu Trump a menasa pa presenta durante e campaña, incluyendo su promesa pa bay tras di e muhenan cu a acus’e di malconducta sexual.
E controversianan aki no ta inclui e auditoria di belasting di e finansasnan di Trump, cu ta keda sin resolve, y caminda cu por ta of no, ta existi
Tin cu corda, Merca, esaki ta e homber cu boso a eligi.
Den e ultimo simannan di campaña, Trump rutinariamente a bisa cu lo ta un “desgracia” nacional si Hillary Clinton a gana y lo enfrenta problemanan legal despues di e eleccion – un argumento cu hopi di su siguidornan a haya convincente.
Un cos cu ta keda un pregunta ta cu si nan ta aprecia e ironia.
Fuente: MSNBC