CIUDAD DE MEXICO, Mexico- Dia 26 di september lo cumpli cuater aña di e desaparicion forsoso di e 43 studiantenan di e Normal Rural Raul Isidro Burgos d Ayotzinapa. Mayornan di e normalistanan lo reuni pa prome biaha cu e presidente electo, Andres Manuel Lopez Obrador.
E intencion di e encuentro, cu lo tuma luga diaranson mainta den e Museo Memoria na Ciudad di Mexico, lo ta pa defini e ruta pa trece claridad den e caso, cu ainda ta impune despues di varios investigacion tanto di gobierno Mexicano como un grupo di investigadonan independiente.
Probablemente lo tene un conferencia di prensa conhunto despues di e reunion, unda cu ta previsto e participacion di López Obrador; Olga Sánchez Cordero, titular propuesto di Secretario di Gobernacion (Ministerio di Interior); Alejandro Encinas, titular propuesto di e subsecretariado di Derechos Humanos, Poblacion y Migracion; representante di e famianan di Ayotzinapa; e Comision Interamericano di Derechonan Humano (CIDH), e representante di Mexico den e High Commisioner di Nacionann Uni pa Derechonan Humano (ONU-DH); presidente di e Comision Nacional di Derechos Humanos (CNDH) di Mexico, como tambe representatnte di cuater organisacion civil cu a destaca den e defensa di e derechonan humano na Mexico.
Ademas, dia 26 di september den oranan di atardi lo realisa un marcha pa exigi husticia, cu lo avanza pa e avenida Paseo de la Reforma, e mas emblematico di Ciudad de Mexico, y lo yega te na Zocalo.
E investigacion aki tabata yena di errornan, segun un Grupo di Investigacion Independiente, y cu ta contradeci e ex presidente Enrique Peña Nieto, cu ta bisa cu e 43 studiantenan a wordo kima den un dump.