SEOUL, Corea del Sur- E político liberal Moon Jae-in diamars a gana e eleccionnan presidencial di Corea del Sur. Cu e victoria aki Corea del Sur ta termina cu casi un decada di gobiernonan conservador y a priminti di hiba un enfoka mas conciliado cu Noord- Korea.
E victoria di Moon lo caba cu e lunanan di turbulencia politico cu a conduci na e huicio politico den Parlamento na e ex- presidente Park Geun-hye pa un escandalo di corrupcion. E destitucion posteriormente a wordo ratifica pa un tribunal.
Asina Park ta bira e prome lider elegi democraticamente na Korea del Sur na wordo removi for di su cargo, locual a genera un eleccion rapido pa elegi su sucesor.
Cu 48% di e votonan conta, Moon tabata tin un 39,6% di apoyo di e votantenan, segun e Comision Electoral Nacional. E conservador Hong Joon-pyo ta sigui su tras cu 26,3 %, mientras que mas patras a keda e centrista Ahn Cheol-soo cu 21,3 %
E resultadonan aki ta coincidi cu un encuesta haci pa e tres cadenanan di television mas grandi di Corea del Sur, cu a mustra cu Moon, di 64 aña a logra 41,4% di e votonan entre 13 candidato.
Mas probable ta cu Moon lo asumi presidencia di su pais diaranson pa un periodo di cinco aña. Prome cu su triunfo el a bisa di lo evita un ceremonia di instalacion excesivo y cu e lo cuminsa traha di biaha.
Moon, cu a perde contra di Park den e ultimo eleccionnan presidencial na 2012, a critica e conservadornan pa no a stop de desaroyo armamentistico di Noord- Korea. E ta boga pa un politica di dos banda” un banda e dialogo y na e otro banda, mantene e presion y sancionnan pa cambionnan.
Fuente: Reuters