E situacion na Venezuela ta hopi “HOT” awe debi na e manifestacionnan cu oposicion a convoca y mas ainda ora cu e presidente di Asamblea Nacional di Venezuela, Juan Guaido a huramenta dilanti tur hende na Caracas, usando e articulonan di Constitucion Venezolano 233 y 333. Djis algun minuut despues di e hecho historico aki, Presidente di Merca, Donald Trump via e cuenta di Twitter di White House a declara cu oficialmente e ta reconoce e presidente di Asamblea Nacional di Venezuela, Juan Guaido como presidente interino di Venezuela.
Esaki a causa hopi alegria di parti di oposicion pasobra asina e proceso di destitui Nicolas Maduro por cuminsa cana pero mester di mas apoyo di otro paisnan manera expertonan ta duna di conoce. Gobierno tambe a convoca un manifestacion, aunke esaki no ta mes grandi cu esun di oposicion, pero ta wardando awo pa un anuncio di parti Nicolas Maduro. E proceso awo ta cu Guaido mester ehecuta e medidanan pa tuma control di recursonan y podernan di e estado y esaki mester bai hunto cu apoyo di Guardia Nacional. Y ta aki cu cosnan no ta mucho cla ainda con esaki lo bai ta pasobra ta conoci cu Nicolas Maduro sigur no lo bai permiti esaki. Y manera nos a meciona mas pais mester mustra nan apoyo y reconocimento pa Gauido como presidente transistorio di Venezuela. Pues ta hopi interesante e proximo dianan aki na Venezuela. Spera cu Dios sa di protege e pueblo inocente cu ta luchando pa su libertad di e tirania di Maduro. ULTIMO ORA: Un rato pasa Colombia, Brazil, Chile, Paraguay y hasta e presidente di UEA tambe a duna nan respaldo y ta reconoce Juan Gauido como presidente di Venezuela. Sinembargo, Diosdado Cabello como vice presidente di Venezuela a jama tur hende na fabor di Gobierno pa reuni dilanti Palacio Miraflores pa defende Nicolas Maduro.