DEN HAAG, Hulanda- Awendia e tecnologia ta asina avansa, cu por bisa cu nos ta esclavo di e tecnologia. Cu e yegada di telefonnan celular, rednan social a bira super popular y e caracteristica ‘curioso’ di e ser humano, ta pone cu e kier wak/lesa e mensahe manera cu esaki a drenta.
Pero di otro banda, e constante ring, vibrate, ping di mensahenan cu ta drentando ta bira dado momento, super iritante. Y esaki ta e caso tur caminda, departamentonan gubernamental, empresanan priva. Y como tal, sala di parlamento no ta un excepcion.
Hopi biaha por mira durante transmision di reunionnan di parlamento cu, mientras un minister of parlamentario ta na palabra, e demas minister, parlamentarionan y/o e publico, ta mas bezig cu nan telefon, cu nan ta pone atencion na loke e orador di momento, ta bisando.
Esaki tabata e caso tambe den Tweede Kamer, caminda cu na mas di un ocasion, presidente di Tweede Kamer, Sra. Khadija Arib, mester a hala atencion di e Minister di Husticia, pa motibo di e telefon celular. Dado momento, mientras cu tabata tin un orador na e momento ey ta hiba palabra, miembro di Tweede Kamer, Van Rooijen, ta bin dilanti y ta entrega su celular na Presidente di Parlamento.
Aki por mira claramente, cu e presidente di Tweede Kamer no ta haci wega y ta enfatisa cu e telefon celular ta un distraccion.
Kisas esaki tambe ta un ehempel pa sigui aki na Aruba?