LIMA, Peru- Presidente di Peru, Pedro Pablo Kuczynski, diaranson a entrega su renuncia, segun informenan di medionan di prensa, cu ta cita fuentenan di e Conseho di Minister den nan informacion.
Segun e corant “La Republica”, prome cu a tuma e decision, e mandatario Peruano a reuni cu e cardenal Juan Luis Cipriani y despues a bay e Palacio di gobierno pa participa na e conseho di minister, reunion caminda cu a keda acorda cu Kuczynski lo laga su cargo definitivamente despues di un aña y shete luna dirigiendo e pais.
Den e cita cu su gabinete, e ministernan a señala na e mandatario cu si e no renuncia di biaha, tur e integrantean di e presidente lo presenta nan renuncia.
E renuncia ta bin un dia prome cu e lo mester a enfrenta den Congreso un reunion caminda pa di dos biaha, lo a pidi pa su renuncia relaciona cu e caso Odebrecht. Esaki ta bin mei mei di un crisis politico genera pa e revelacion di video y audio cu ta mustra cu a purba cumpra voto pa evita e distitucion di e mandatario. E situacion aki, anuncia pa e partido Fujimorista, Fuerza Popular, a pone Kuczynski den un hanchi sin salida.
Poco prome, al menos 6 di su 14 miembronan di su partido oficialista Peruanos Por el Kambio (PPK) a uni nan mes na e peticion pa Kuczynski bandona su cargo mirando e situacion cu e pais ta bibando.
Kuczynski, di 79 aña, lo bandona e cargo, cual el a asumi dia 28 Juli 2016, despues di cu su renuncia wordo acepta pa Congreso y, segun constitucion, e mester wordo reemplasa pa e prome vicepresidente, e ingeniero Martin Vizcarra, kende tambe ta e actual embahador Peruano na Canada.
Fuente: http://www.dw.com