Presidente di Parlamento, Mervin Wyatt-Ras ta informa cu dialuna mainta tabatin un “vragenuur“ den Parlamento pa trata e procedura di nombracion di Gobernador nobo pa Aruba. Sr. Rene Herde di fraccion di AVP a pidi e vragenuur aki y despues a ricibi preguntanan tambe di parlamentario independiente sra. Marisol Lopez-Tromp. Ministro Presidente, mr .Mike Eman a contesta preguntanan y a informa Parlamento mas den detaye di un carta cu Gobierno a manda pa Gobierno Hulandes, esta minister Plasterk pa mustra e descontento di Aruba en cuanto dicho procedura. Manera cu minister a splica ta cu Hulanda no a scoge entre e candidatonan cu a ser manda a base di e reglamento pa loke ta trata nombracion di Gobernador, sino a propone su propio candidato y a manda esaki den un tempo hopi cortico pa Rey firma den un Koninklijk Besluit. Manera splica a desvia di e procedura. Gobierno sin embargo a scoge pa no bay guera cu Hulanda, mas bien a mustra su malcontento den un carta. Despues ora gobierno a bay Hulanda a yega hunto cu Hulanda na un declaracion conhunto. Minister Plasterk mes ta papia di un schoonheidsfoutje ora e ta papia di e procedura di nombracion. Despues cu Gobierno a contesta e preguntanan, e miembronan di Parlamento cu a haci pregunta a haya cada un 2 minuut pa haci remarke y preguntanan adicional. E otro miembronan di Parlamento a haya 1 minuut pa haci pregunta den caso nan tabatin esaki.
Por bisa cu e tabata un “vragenuur” productivo unda cu diferente documento a ser otorga na miembronan di Parlamento y Parlamento por a ser informa debidamente. Loke alabes a mustra ariba dje ta e falta di un “conflict-” of “geschillenregeling” pa atende cu diferencianan di e indole aki.