Presidente di Parlamento, drs. Mervin Wyatt-Ras ta treve padilanti cu durante aña 2016 diferente ley y topico importante a keda trata den Parlamento. Por bisa cu a discuti encuanto nos Salubridad cu un cantidad di stakeholdernan den Parlamento y cu minister encarga cu Salud. E comision encarga cu Salud a traha un rapport cu recomendacionnan pa minister pa mehora e situacion di nos Salubridad, cual rapport a keda aproba den reunion di comision central. A discuti alabes cu stakeholdernan encuanto e topico di abuso di mucha cu ta un topico cu cada bes ta bin padilanti enbista cu apesar cu ta haci diferente trabounan pa atende cu victima toch ta necesario mas profesional, mehoracion di e cuido/servicionan y leynan. Un topico cu a ricibi hopi atencion den Parlamento den ultimo lunanan di e aña anterior ta e topico di criminalidad. Aki a ricibi informacion tanto den bijeenkomst y a discuti cu e minister concerni den un reunion Pubico pa analisa e situacion di seguridad di nos pais. A aproba e ley cu ta acapara hopi tereno di derecho pa nos ciudadanonan, esta e Codigo Civil of Burgerlijk Wetboek. E ta regarda banda di derecho pa carga un nomber y fam, derecho di bon educacion y proteccion, derecho pa victimanan di abuso di menor, derechonan laboral, ora di malesa y ora di embaraso y parto. A discuti oranan largo pa tur fraccion por yega na otro pa sostene un amienda tocante “geregistreerd partnerschap”. Alavez a trata den reunion di comisionnan e ley di iniciativa di ombudsman y kinderombudsman y diferente leynan di iniciativa di sr. Sneek y Rasmijn. Na final di aña a trata alabes diferente ley importante pa garantisa “accountability” di nos pais, manera prespuesto 2017 cu e aña aki a ser entrega na tempo segun nos Constitucion ta indica, tambe e Jaarrekening 2015, e Prespuesto Supletorio 2016 y diferente ley manera di landslaboratorium, FCCA y motorrijtuigenbelasting. Tur e leynan cu a ser trata na fin di aña a tuma lugar den consulta cu diferente entidad relevante. Pues no ta pa malo nan a ser trata na fin di aña. Wyatt-Ras a wanta hopi critica den su direccion comosifiera ta paso e kier e ta trata diferente ley na fin di anja. Hecho ta cu tabatin un planning pa cu esaki y aki aya a resulta di tin retraso den e planning. Wyatt-Ras a keda desapunta di e acusacionnan inhusto den su direccion paso ora a trata leynan den ultimo dianan di aña oposicion practicamente tabata ausente durante e reunion publico. Pa e aña venidero Wyatt-Ras ya caba por a tende cu a ser anuncia cu cierto fraccion lo prefera di campanja cu bin reunion. Wyatt-Ras ta compronde cu enbista cu esaki ta anja di eleccion parlamentarionan lo kier cana mas den pueblo sinembargo pueblo ta paga nan tambe pa representa nan den e parlamento. Wyatt-Ras lo tene cuenta si cu eleccion, locual ta nifica cu gobierno lo mester presenta leynan cu tin cu ser trata promer cu eleccion tin cu drenta Parlamento tempran. Aki lo pone tur prioridad y intencion ta pa trata dicho leynan y pa e anja aki lo tin consulta cu e entidadnan corespondiente. Pa e aña aki Wyatt-Ras ta spera banda di diferente ley cu lo tin cu ser pasa manera esun di Crèche y esun tocante Functiehuis lo atende cu reglament di orde di Parlamento, cu Codigo di Conducta di miembronan di Parlamento y otro asuntonan. Ademas e proceso di digitalisacion lo continua y lo atende cu siguridad den e edificio. Wyatt-Ras un biaha mas ta gradici su coleganan pa e apoyo y Griffie su personal tambe un danki di curason, mescos tambe departamento, entidad, profesionalnan y prensa. E aña aki ta un aña yen di reto cu e eleccion dilanti porta. Wyatt-Ras ta spera cu por logra pa trata leynan necesario prome cu eleccion.