Presidente di Parlamento tabata presente na diferente actividad pa loke ta trata nos cultura, nos Himno y Bandera. El tabata tey ora a scoge nos poeta di patria dedica na e ultimo couplet di nos Himno, esta Grandesa di nos pueblo ta su gran cordialidad. El a bishita alabes e celebracion na Funari pa esnan cu deficiencia fisico, inauguracion di Plaza Padu, unda a honra alabes sr. Lio Booi y Sr. Rufo Wever d.f.m. Wyatt-Ras ta felicita famia di nos valuartenan cu e logro importante aki. Presidente di Parlamento tabata tambe na e acto protocolario dia 18 di Maart mainta unda e.o. a skucha e discurso elocuente di Ministro Presidente, a presencia bunita actuacion di sra. Maybeline Arends-Croes y su coro, a gosa di baile di gruponan y gran dama cultural y a disfruta di e desfile di gruponan social y di deporte. E e tabatin alabes un encuentro cu e Presidente di Parlamento di Corsou y diferente parlamentarionan tanto di Corsou como St. Maarten. Wyatt-Ras a bishita tambe un actividad na un fundacion cu ta traha cu adictonan. Finalmente e tabata presente na Festival di sopi ameno. Wyatt-Ras no por a acudi tur caminda mirando e tempo corto. E ta felicita tur boluntario cu a traha e dia ey y nos conciudadanonan cu a acudi masalmente na e actividadnan den bario. Pabien Aruba cu un ehemplar celebracion di nos Himno y bandera.