Presidente di Parlamento, Mervin Wyatt-Ras, ta declara di ta satisfecho cu tratamento di presupuesto di pais Aruba ta bay “vlot”. Dicho presupuesto e aña aki a keda entrega na tempo na Parlamento segun nos Constitucion y lo kier trata esaki tambe na tempo. Segun Wyatt-Ras e sistema cu a scoge pa trata e presupuestonan un pa un y cu cada parlamentario tin nan 90 minuut den prome tanda y 45 minuut den e segunda tanda pa haci uzo di esaki manera cu nan ke durante e tratamento y cu griffier ta tene conteo di esaki ta un forma cu ta cayendo na agrado. Ademas Wyatt-Ras hunto cu griffier ta conta e cantidad di preguntanan haci y ta calcula cuanto minuut/ora e minister tin mas of menos pa contesta pregunta. Den pasado Parlamentarionan ta papia tanto minuut mientras ministernan ta keda papia oranan den Parlamento. E biaha aki ministernan tambe tin cu tene nan mes na cierto limite di tempo pa nan discurso. A inicia cu tratamento dialuna y ya caba a finalisa 6 di e 9 ministerionan, esta di Finansas, Economia, Husticia, Infrastructura, Asuntonan Social y Turismo. Pa otro siman ta keda Salubridad, Enseñansa y Asuntonan General. Por spera cu e ultimo presupuesto lo capta mas atencion y por na final lo vota ariba e presupuesto. Presidente ta haya lastima cu atencion durante e siman cu a pasa no a bay pa e bon preguntanan cu Parlamentarionan a haci na Gobierno y mocionnan cu a ser presenta sino na un discucion cu a tuma lugar entre dos parlamentario unda cu un a tira palabra pa e otro y e otro a reacciona y asina a start un tiramento di palabra pa otro.
Wyatt-Ras kier duna contesta na tur esnan cu enbes di wak kico a pasa a scoge pa critica e presidente den medionan social. Wyatt-Ras ta reitera cu cada parlamentario ta responsabel pa su comportacion y actitud den Parlamento. Cada parlamentario ta eligi door di pueblo di Aruba pa representa nan. Wyatt-Ras ta enfatisa cu e no ta lider di crèche cu tin cu pone parlamentarionan sinta keto of manda nan para den huki. Esun cu tira palabra pa otro por spera di haya contesta di e otro. Wyatt-Ras no ta aproba e forma aki, sinembargo Wyatt-Ras no ta deal cu mucha sino cu adultonan cu mester sa nan limite y para responsabel pa nan actonan. Wyatt-Ras mes a wanta hopi palabra di abuso no mucho tempo pasa den Parlamento y e no a tende niun hende sali na su defensa. E mes a sa di maneha e situacion, sin cu niun hende a ser atendi ariba esaki. En bista cu reunionnan ta ser televisa henter pueblo por wak kico ta pasa y ken ta haci kico. Ademas un medaya semper tin dos banda. Natural ta keda si e actitud di e parlamentario ta hopi ofensivo of extremo tin cu actua segun reglement van orde ta indica y hasta por bay over na saca miembronan di parlamento for di sala. Wyatt-Ras ta spera cu otro siman bay manera eficiente manera e siman aki y cu pronto nos por keda cla pa asina tur e departamentonan di Gobierno y fundacionnan por haya nan financiamento pa nan por haci nan trabou/ofrece servicio den bienestar di nos comunidad.