Presidente di Parlamento Marisol Lopez-Tromp a splica mas di e carta cu awor lo bay wordo manda pa tur membro di Parlamento, pa nan sa e tema di preocupacion cu tin pa loke ta e amienda den e ley di Codigo Civil.
Awe presidente di Parlamento a ricibi pastoor cu ta representa e grupo di ciudadanonan preocupa, Doodle Sophia, kende a bin compaña pa mas persona, pa bin entrega nan manifiesto na parlamento pa cierto parlamentarionan haya nan opinion riba e amienda entrega pa Parlamentario Desiree de Souza-Croes.
E carta cu nan a entrega ta pa duna di bisa cu nan no ta di acuerdo cu e amienda. Nan a splica den dje pakico y cu e ta contra Ley di Dios. A splica un pida riba esaki y tambe nan a trece padilanti cu nan ta hopi preocupa cu e nucleo familiar na Aruba. E ta pensa tambe den e caso aki, ki efecto lo bay tin pa nos yiunan.
Den esencia di esey nan ta pidi na e Parlamentarionan pa no aproba e amienda di Desiree Croes y den e caso aki ta desea Parlamento hopi forsa y sabiduria con pa trata e reunion aki.
E carta ta representa pensamento di un grupo y a ricibi esaki.
Lopez-Tromp a sigui splica cu mirando awor aki pa un amienda a schors un siman, despues cu e ley a prepara cinco aña y dos luna, e reunion aki ta anuncia. Tur hende conoce e contenido di e Codigo Civil caba y a ricibi dos carta, caminda cu e lider di fraccion, Andin Bikker, ta pidi poco mas tempo, den nomber no solamente di su mes, pero di e dos otro lidernan di fraccion. Aunke nan no a firma e carta ey, pero a ricibi’e. Tambe ta asina cu a ricibi un carta di minister Dowers, cual ta wordo manda pa tur miembro di Parlamento, caminda cu e ta pidi di mas tempo. En esencia ta habri un reunion publico y trata e cartanan aki, mirando cu pueblo tin derecho di informacion riba tur carta cu drenta. No ta asina cu pasobra algun miembro di Staten ta manda un carta pa pospone y ta bay core pospone sin splica pueblo pakico. Pueblo mester sa pakico, pueblo mester sa pa ki reunion e ta y pakico e cartanan a drenta. Kico e pensamento di e parlamentarionan ta y tambe di e minister en cuestion. Lo trata esaki pasobra ta importante pa nan sa e contenido di e peticionnan cu a keda ricibi.