Presidente di Parlamento, drs. Mervin Wyatt-Ras ta informa cu diamars dia 10 di januari a inicia e reunionnan di IPKO (Interparlementair Koninkrijksrelaties Overleg). E reunion aki entre e delegacionnan di Aruba, Corsou, Sint Maarten y Hulanda lo tuma lugar te cu dia 13 di januari.
Ariba e prome dia tabatin diferente discurso di e presidentenan di Parlamento di Corsou, Sra. Giselle Mc Williams, di St. Maarten, Sra. Sarah Wescott, di Hulanda, Sr. JeroenRecourt y di Aruba Sra. Mervin Wyatt-Ras. Wyatt-Ras su discurso tabata cortico y fuerte.
Despues di gradici e delegacion di Corsou pa e bon recepcion y felicita e presidentenan di Parlamento di Corsou y di St. Maarten cu nan nombracion y tambe felicitacion di e constelacionnan nobo di Corsou y St. Maarten, el a mustra ariba e hecho cu tin diferente cambionan den constelacion y cu esaki ta dinamismo di bida y cu cambionan ta welcome den bida. Pero cu cambionan no por stroba e proceso continuo den e reunionnan di IPKO. El a indica cu nos lasonan den Reino ta depende di e contacto continuo entre representantenan di pueblo di e diferente paisnan den Reino. Sin embargo esaki mester ta structura.
En bista di esaki e delegacion di Aruba a pensa pa no pospone IPKO manera anteriormente a ser treci padilanti dor di otro coleganan. Ta di importancia pa papia tocante diferente tema. Wyatt-Ras a expresa su deseo pa e delegacionnan por tin intercambio fructifero. Tur esaki a base di igualdad y respet mutuo y cu mester sirbi interes di Reino. Wyatt-Ras a gradici un y tur y desea su coleganan un siman informativo y productivo. Despues a trata diferente tema entre nan oportunidadnan economico den Reino, Presentacion di un proyecto di energia thermico, cambio di clima y energia. Ademas a trata e tema Reino Ideal den 2040.
Na final tabatin un presentacion y bishita na proyectonan di Waf. Pa e otro dianan lo trata e siguiente topiconan: hobennan y hubentud, AOV/AOW hobennan, derecho di leynan di iniciativa, procedura pa Ley di Reino pa loke ta trata areglo pa disputanan y dubbeletaaltoets, integridad di gobernacion, Corte Constitucional, Salubridad Publico pa despues haci un bishita na e Hospital nobo di Otrabanda. Diahuebs dia 12 lo tin un presentacion di y bishita na e proyecto Oostpunt.