Presidente di Parlamento, den presencia di ministro Presidente mr. Mike Eman, Gabinete Eman y diferente organo importante a dirigi e reunion di despedida di su excelencia gobernador Refunjol. Despues cu a duna oportunidad na discursonan di lidernan di fraccion presidente di Parlamento a dirigi su mes na su excelencia pa despues pasa palabra pa gobernador.
Wyatt-Ras a trese padilanti cu algo mas cu 12 aña pasa esta Mei 2004 den mes un formato asina Parlamento di Aruba a tene un reunion solemne pa duna su excelencia e oportunidad pa pronuncia e discurso di aceptacion di e funcion di Gobernador di nos pais Aruba. Wyatt-Ras mes tabatin e privilegio y dicha di por tabata presente na e momento historico ey. Mientrastanto 12 aña a transcuri y awe su excelencia lo duna un otro discurso pero e biaha aki vociferando e palabranan di despedida for di un funcion cu su excelencia a sa di cumpli cun’e. Wyatt-Ras a trese padilanti cu banda di e funcion di ta representante di corona Hulandes, manera nos statuut articulo II inciso 2 ta bisa, su excelencia tabatin e oportunidad di fungi den diferente signatura di gobernacion como hefe di Gobierno manera ta regla den nos constitucion. El a fungi ademas den diferente constelacion Parlamentario y tambe como minister. Sin lubida gobernador tabata pa 8 aña un maestro di skol hopi stima pa su alumno y mayornan. Esaki sin duda ta muestra di dedicacion, determinacion y perseverancia, meritonan cu indudablemente ta injerente na e persona di su excelencia. Durante di e 12 aña como gobernador tabatin momentonan agradabel como desagradabel. Wyatt-Ras a trece padilanti cu aki por nota cu su excelencia a sa di surpasa e momentonan ey uzando e conocemento amplio di bida y e forma di proceder trankil y calmo pa sali for di e situacion, formando asina un forsa stabilisante manera un hefe di Gobierno mester ta.
Su excelencia semper a tene su mes altanto di e trabao legislativo di Parlamento, en bista cu su excelencia tambe tabata parlamentario. A conoce encuentronan mensual cu señor gobernador y e lidernan di fraccion y cu presidente di Parlamento. Semper su excelencia tabata tin palabranan di conseho riba e diferente topiconan.
Den e prome 30 añanan di nos Status Aparte Aruba a conoce 3 Gobernador. Wyatt-Ras a trece padilanti cu awor sin duda su pensamentonan ta bay na señor Felipito Tromp den feliz memoria cu na inicio di nos status nobo den reino cu dedicacion a eherce e funcion di nos prome Gobernador, despues sigui pa su excelencia mr. Olindo Koolman kende tambe cu tur honor y dedicacion a desplega su funcion y despues sr. Refunjol mes cu tambe a haci un bon trabou. Tres yiu di tera cu nos pais y su pueblo mester ta orguyoso di nan, tres yiu di tera cu mescos cu nos lidernan cu nos pais a conoce y ta conociendo ta demostra cu Aruba tin derecho di ta parti igual den reino Hulandes. Wyatt-Ras ta sigui bisa cu aunke nos ta un pais mas chikito den e reino Hulandes, nos a y ta demostra cu nos mesun hendenan tin e capacidad y amor patrio pa yena cualkier funcion halto. Aki nos ta duna ehempel na nos hobennan pa stima nos mes y nos pais. Alabes pa dedica na estudio pa den futuro por desplega funcionnan importante.
Wyatt-Ras, den nomber di Parlamento di Aruba, a expresa palabranan di gratitud pa e trabao y dedicacion desplega dor di gobernador Refunjol na bienestar di nos pais Aruba.
Wyatt-Ras a referi na e dicho: “Banda di cada homber exitoso ta para un hende muher fuerte”, esaki sigur ta e caso cerca señor Gobernador.
E presidente di Parlamento a gradici señora Clarette pa e dedicacion, e pasenshi, cariño y apoyo na señor Gobernador pa asina por a eherce e funcion importante ey. Entre otro señora Refunjol ta miembro honorario di Woman’s Club.
Un danki a bay tambe na e yiu y nietonan di señor Gobernador. Presidente a desea señor Gobernador, señora, yiu y nietonan hopi salud y forsa pa cu e etapa nobo cu ta cuminsa den e bida di señor Gobernador. Segun presidente di Parlamento gobernador lo por ta mas na cas pa cushina e dushi soppinan y hasa pisca pa henter famia come, e lo por inverti mas tempo den su amigonan den deporte y e por gosa mas den pueblo di Savaneta, specialmente na Zeerovers. Wyatt-Ras a desea cu Todopoderoso por baha su bendicion ariba sr. Refunjol y famia. Despues di e discursonan tabatin un brindis chikito cu gobernador. Wyatt-Ras na final a gradici tur presente y a desea un y tur feliz dianan di fiesta.