Dialuna mainta 7 di November Aruba a bini hunto den un reunion solemne pa cumpli cu stipulacionnan di ley cu ta regarda reglamentonan di Gobernador, articulo 14 inciso 2 cu ta fiha cu e Gobernador Interino di pais Aruba mester presenta den un reunion solemne di Parlamento un transcripcion di e decreto real y e acto di huramentacion cu ta decreta e persona den e cargo di Gobernador Interino na e prome ocasion cu e fungi como tal. Cumpliendo cu e stipulacionnan aki, a keda entrega dor di ayudante di Gobernador na Parlamento y despues cita pa Griffier di Parlamento, e documentonan concerni, caminda Gobernadora interino, Su Excelencia señora Yvonne Veronic Lacle-Dirksz ta actua como Gobernadorna Interino.
Presidente a yama bon bini na Su Excelencia Gobernadora Interino señora Yvonne Veronic Lacle-Dirksz y su distinguido esposo den Parlamento di Aruba. Den nomber di pueblo Arubano el a felicita Su Excelencia Gobernadora y su famia pa e encargo aki.
Wyatt-Ras den su discurso dirigi na nos Gobernadora Interino a trece dilanti cu su Excelencia ta conoci como un persona confiabel cu hopi iniciativa y entusiasmo. Un persona preciso, envolvi y cu ta gusta traha dirigi riba resultado. Un persona cu ta cla pa yuda y cu por uni otronan. Alabes cu su Excelencia ta un persona cu un trayectoria amplio di trabou. Como maestro y docente den enseñansa pa 42 aña el a forma un cantidad di nos hobennan, adultonan di awe. Tambe el a ocupa cargonan riba nivel halto di maneho pa pais Aruba. Su Excelencia a fungi como Director di Gabinete di e minister Plenipotenciario na Hulanda. Aki banda di su labornan diario di maneha dicho Gabinete el a traha cu studiante y patientnan Arubiano. Tambe e tabata adjunct-director di Maria College Mavo. Awor cu e cargo sumamente importante Su Excelencia Gobernadora Interino lo tin un tarea na momento cu su Excelencia Gobernador ta ausente, por ehempel pa motibo di compromisonan di trabou den exterior. Señora Gobernadora interino tin cu vigila e interes di Reino den pais Aruba pero tambe e interes general di Aruba den Reino.
Presidente di Parlamento a expresa cu e hecho cu señora Gobernadora ta un ser femenino ta haci’e sinti su mes hopi orguyoso di dje y cu e ta kere esaki ta conta sigur pa tur otro hende muher.
Presidente di Parlamento a gradici alabes e Gobernadora Interino saliente, señora Ella Alicia Tromp-Yarzaray, pa su dedicacion y contribucion y bon trabou durante 8 aña cu e tabata Gobernadora Interino. Wyat-Ras a finalisa su discurso pidiendo Dios Todopoderoso pa bendiciona y ilumina caminda di su Exelencia Gobernadora Interino y pa laga e ta su guia. Wyatt-Ras tabata contento cu e entidadnan cu acudi na e reunion importante aki.