Presidente di Parlamento, drs. Mervin Wyatt-Ras y su esposo, tabata presente na e evento organisa door di Camara di Comercio titula: “Ctrl-Alt-Delete: Challenge today’s Cyber Security thinking” cu a enfoca ariba con pa detecta y evita atakenan cibernetico den sistema di negoshi. Despues di un discurso di e presidente di Camera di Comercio, sra. Daphne Agius Cesareo Lejuez, a sigui e presentacion di sr. Ricky Gevers cu ta chief intelligence Officer den e departamento di e compania Hulandes RedSocks. Sr. Gevers a yuda den diferente caso di di crimen cibernetico internacional. El a duna un demostracion di con vulnerabel nos sistema ta pa otro por drenta den nan. Un hacker por drenta cierto sistema facil paso e ta haci’e via di e link vulnerabel den e sistema. Den hopi caso ta e mesun CEO di e compania. Un compania por ta full seguro pero di e CEO no ta uza e mesun sistema via di dje un hacker por drenta full un sistema cu ta paga asina tanto pa proteha. El a duna ehempel di diferente departamento y instancia cu por drenta facil den nan sistema. Specialmente companianan petrolero ta un target di hackers. Un tip importante ta pa update e computer continuamente y pues ta pro-activo. Wyatt-Ras a haya e informacion hopi valioso y ta felicita Camara di Comercio cu e evento importante aki.