Presidente di Parlamento tabata presente na apertura di e edificio di MFA na Paradera. E edificio multifunctional aki cu a haya e nomber Cas di Mito Croes lo ofrece diferente tipo di servicio na comunidad di Paradera y vecindario. Wyatt-Ras, di cual su difunta mama tabata procedente di Piedra Plat, siguramente ta apoya cu servicio na nos ciudadanonan ta mas cerca di cas y cu nos hendenan no tin cu paga transporte pa haya servicio na Playa sino por cana bay na e facilidad cerca di nan cas. Minister Presidente a trece padilanti cu MFA ta parti di su vision pa hisa calidad di bida den nos barionan. Loke ta necesario segun Wyatt-Ras ta cu nos hendenan cu problemanan social tambe por busca ayudo na e edificio aki y por a tuma nota for di minister di Asuntonan Social cu lo ubica servicio social den e facilidad aki. Wyatt-Ras siguramente ta apoya e desaroyo aki. Nos hendenan tin derecho di haya oido pa nan situacion y nan problemanan. Presidente di Parlamento ta felicita pueblo di Paradera cu e facilidad aki.