Presidente di Parlamento ta informa cu dialuna atardi lo inicia cu tratamento di e ley di CITGO den reunion publico di Parlamento. E ley aki lo haci cu por tin reapertura di nos refineria cu lo trece un spin off economico grandi pa nos pais y un cantidad di 600 trahado lo haya empleo mas 1000 otro cu lo traha cu contratistanan. Ya prome cu reces e ley aki lo mester a yega parlamento y tur parlamentarionan lo mester a bin bek pa por trat’e.
A tarda un tiki pero siman pasa porfin el a drenta Parlamento. Presidente a yama un seniorenconvent inmediatamente y palabra cu lidernan di fraccion e procecedura di trata e ley. En bista di e deadline 1 di October tin urgencia pa trate e ley. Gobierno mes ora tambe a entrega documentonan ter inzage pa Parlamentarionan por studia di antemano. Esaki no a cay den bon tera cerca fraccionnan MEP, PDR y parlamentario independiente y nan tabata kier masbin copia di e documentonan. Presidente di Parlamento a tuma e peticion di parlamentarionan na serio y a manda un carta pa asina pidi gobierno pa manda copia di e documentonan pa Parlamento. Despues di e contesta di gobierno cu no ta prudente pa duna e documentonan aki den man, Presidente a base di un carta ricibi di e tres fraccionnan, firma conhuntamente, a bolbe pidi gobierno pa otorga copia.
Wyatt-Ras a manda 2 carta pues pa gobierno pa pidi documento y asina mes no ta bon pa e tres fraccionnan aki. Tanto MEP y otronan di oposicion a scoge pa bay critica Mervin Wyatt-Ras inhustamente tanto den corant como riba facebook y na radio, hasta na Tweede Kamer, Eerste Kamer y na gobernador.
Nunca antes bao di presidentenan anterior no tabatin posibilidad di haya stukken ter inzage prome cu reunion publico. Mas bien ta durante reunion publico despues cu parlamentarionan pidi hasta varios biaha nan sa haya stukken ter inzage. Probablemente Parlamentarionan di oposicion aki no kier e transparencia aki y den futuro tin cu warda te den reunion publico pa pidi stukken ter inzage.
Den e caso aki parlamentarionan a haya documentonan di antemano pa lesa durante 4 dia cu ta encera 32 ora di trabou ademas tambe a rek e den weekend. Wyatt-Ras despues di a combersa cu gobernador a hasta amplia e orario cu e documentonan por ser lesa den Parlamento, pa den weekend y por a constata cu ta solamente miembronan di un fraccion den mayoria a bin lesa documento den weekend. E reunion publico lo ta dialuna 1:30 atardi. Esaki pa duna miembronan di Parlamento mas ora pa prepara riba un reunion tan importante y historico pa nos pais.