Presidente di Parlamento, Mervin Wyatt-Ras ta trece padilanti cu den reunion Publico a atende cu siguridad y criminalidad den nos pais. Ademas a base di peticion di minister cu ya caba lo a bin Parlamento otro siman a agrega tratamento di e ley cu ta encera principionan penitenciario. Un cantidad di 9 miembro di Parlamento a hiba palabra y a haci hopi pregunta. A reuni di 10:30 di mainta te 5:47 atardi.
Presidente di Parlamento a yama e reunion aki pa asina atende cu criminalidad na Aruba. Dia 14 di September a base di peticion di lidernan di fraccion di MEP, PDR y parlamentario independente a pidi reunion publico. Fraccion di AVP a pidi un bijeenkomst e mesun mainta. Considerando e asesinato e dia anterior y investigacion di polis, Wyatt-Ras a dicidi di yama un bijeenkomst e mainta ey mes pa ricibi informacion di diferente instancia y pa expresa preocupacion di Parlamentarionan. E siman aki a yama e minister pa por atende cu e reunion publico pidi pa tres lider di fraccion. Minister tabata presente hunto cu diferente hefenan di departamento y conseheronan.
Minister a presenta un nota di cambio den cual ta introduci den Codigo penal cu castigo di bida largo of castigo temporal di Maximo 30 aña of Boet pa e persona cu a comete crimen fatal contra un ambtenaar den funcion.
Dos mocion presenta door di fraccion di AVP a keda aproba unanimante igual cu e ley di principionan penitenciario. Wyatt-Ras ta satisfecho cu e nivel di e reunion unda cu tabatin preguntanan al caso y contestanan tambe tabata al caso. A pone pues prioridad pa atende cu seguridad di nos pais y pa combati criminalidad y a haya impresion cu instancianan concerni ta haciendo nan trabou.