E di dos persona cu a yega pa un cita cu Gobernador riba dialuna mainta tabata presidente di Parlamento mr. Juan Ady Thijsen.
E bishita ta pa e duna su contribucion na e proceso cu mester sigui pa yega na formacion di un Gabinete.
“Ta importante pa scucha Presidente di Staten, pa scucha con e ta mira e situacion y kico ta kere cu ta importante den cuadro di democracia di e pais,” Thijsen a bisa prensa pafo despues di su reunion. Y a agrega cu e proceso di formacion ta hopi importante pa e cuatro añanan cu ta bini awo.
Manera semper, contenido ta secreto. A base di loke scucha tin e opcion pa bay di biaha pa un Formador of ta cuminsa e proceso cu un Informador. E ta kere cu ta sondea pensamento di esnan scucha di cual ta e puntonan cu nan ta kere ta importante pa tene cuenta cu nan ora cu papia cu tur esnan cu ta hunga un rol den formacion di un Gabinete nobo.
Thijsen a bisa cu mester bini un Gabinete pero con ta bay forme, e proceso aki lo bay determina esey. Loke ta importante, el a bisa, ta Aruba su estado di derecho, relacion cu Hulanda.
E no kier a bisa si e ta postula su mes como presidente di Parlamento, pero cu esaki ta algo cu ta keda den man di un comision di cada partido, cu ta haci esaki a base di e balor agrega cu e persona por duna.
Tambe e actual presidente di Parlamento a bisa cu Aruba ta na un momento cu mester pone e persona corecto den e posicion corecto. Awo no tin momento pa tene hende contento y e ta conta pa tur partido politico. Mester cera cabes y hiba Aruba dilanti. “Mi ta spera cu nos ta keda cla cu formacion di e Gabinete aki mas lihe posibel pasobra tin hopi trabou pa haci.”
Pa loke ta resultado di e eleccion, el a pensa cu MEP lo ta e partido mas grandi. Pero a pensa cu lo a haya mas apoyo. “Pueblo a papia bon cla. Pueblo a bisa cu nan no ta duna ningun partido un mayoria absoluto. Ta duna confiansa den partido MEP y el a bisa cu mester bay den coalicion, nos no sa. E coalicion mester ta di hendenan responsabel, integro, cu tin e capaidad y ta compromete nan mes cu e pais. Cu interes general mester bini prome cu tur cos aki nan, di cualkier partido cu bo ta. Ora bo bira Minister of Parlamentario, bo ta parti di un organisacion, pero bo tin cu sali na vanguardia di e pais.”