Diamars dia 16 di Mei Presidente di Parlamento a reuni cu representantenan di Nacionnan Uni hunto cu representantenan di Gobierno tocante 17 meta mundial pa futuro. E metanan ta entre otro elimina pobresa, elimina hamber, bon salud y bienestar, educacion cualitativo, igualdad entre sexo, awa limpi, energia limpi y pagabel, trabou y crecemento economico, industria innovativo y infrastructura, comunidadnan sostenibel, consumo y produccion responsabel, bida marino y bida riba tera, paz y husticia, etc. Despues a reuni cu Parlamento..
Aruba ta un di e 20 paisnan trendsetter cu tin un comision trahando pa logra e 17 metanan y a ser scogi pa ricibi sosten di Nacionnan Uni. Ta analisando trabou y plannan di Gobierno y evalua si tin sincronisacion entre departamento, ministerio y sectornan priva y gubernamental pa logra e metanan. Ta di importancia pa Parlamento no solamente esnan cu ta sostene Gobierno sino tambe esnan di partidonan di oposicion participa y duna nan feedback pa traha na e metanan. E representantenan di Nacionnan Uni tabata interesa di haya opinion di tur Parlamentario di tur signatura. Lamentablemente ningun miembro di oposicion tabata presente na un reunion importante cu representantenan di un organo neutral y mundial manera Nacionnan Uni.
Presidente di Parlamento lo duna tur cooperacion pa e invitadonan por haya contacto cu esnan di oposicion pa por haya nan opinion.