Parlamentario Ady Thijsen a yama un rueda di prensa awe mainta relaciona cu algun desaroyonan recien den parlamento unda decisionnan cu a wordo tuma pa retira minister Marisol Lopez-Tromp.
A keda un discusion den comunidad pa locual ta e mocion di desconfiansa, tin cuestion di interpretacion segun sr. Thijsen. Prome biaha cu e situacion aki ta surgi pa sr. Thijsen den sentido cu e ta aplica articulo 27 di reglament van ordo den momentonan di votacion. “El a trece hopi discusion y intrankilidad den comunidad, anto a mishi cu estado di derecho. Mi ta keda para riba mi interpretacion cu mi tin y den e caso aki specifico, pero mi ta respeta otro opinion”, sr. Thijsen ta bisa.
Sr. Thijsen ta bisa cu na momento aki interes general ta bay na prome cu tur cos, mester tin stabilidad y trankilidad den nos comunidad. Pues presidente di Parlamento a dicidi di hala aden e mocion di desconfiansa contra Marisol Lopez-Tromp y otro mocionnan cu a wordo presenta den parlamento siman pasa y declara nan nulo. “Esaki ta den cuadro di interes general, stabilidad y trankilidad den nos comunidad. E ta determina tambe e punto di bista cu ta wordo manteni awor y pa futuro”, sr. Thijsen a expresa. E denuncianan haci contra acusacionnan falso si ta keda, esakinan no a wordo hala aden. Loke ta investagacion andando riba menasa contra sr. Thijsen tambe ta keda.
E siguridad y confiansa den instituto di parlamento mester wordo salbaguardia prome cu tur cos, segun sr. Thijsen. Pasobra ora bo ta asumi un posicion di presidente di Staten, bo ta tuma decisionnan y para pa nan, pero mester corda semper cu nos ta biba den un estado di derecho anto ora cu tin diferencia di opinion, esey ta cuminsa bira un problema. “Mi ta kere den e caso aki, cu si bo ta un politico responsabel, bo opinion bo tin cu lag’e un banda, bo tin cu pensa prome pa comunidad”, segun sr. Thijsen.
E presidente a sigui na bisa cu e asunto di corupcion a bira un topico, un problema asina grandi, cu a yega momento cu ken cu bo ta sea bo ta minister of parlamentario, ambtenaar of ciudadano, e presidente ta bisa cu ‘tur esanan cu tin prueba riba actonan penal cu cierto hende a haci, a yega momento pa e wordo poni na Ministerio Publico, y como presidente di Staten mi lo haci tur mi esfuerso pa esaki tuma luga tambe pa tin claridad den esaki.”