Presidente di Parlamento Ady Thijsen a tene un rueda di prensa awemainta pa reacciona riba declaracionnan haci por medio di minister Marisol Lopez-Tromp ayera despues di su encuentro cu gobernador. Den su man e tabata tin documentonan di un keho cu sr. Thijsen a haci na Ministerio Publico pa loke ta trata ‘valse beschuldiging’ – acusacionnan falso.
Sr. Thijsen a trece dilanti cu ora yega momento cu conscientemente of intencionalmente bo ta escohe pa acusa personanan di actonan penal, e ora ‘nos ta bay den un otro dimension’, sr. Thijsen a expresa.
Minister Lopez-Tromp a declara cu sr. Thijsen a pone e griffier marka cu sr. Howell como parlamentario a vota, cual ta algo contra ley.
Presidente di Parlamento ta subraya cu tin hende kier hunga wega pa purba atacha credibilidad di hende y acusa hende. “Sr. Howell a contesta y bisa cu e ta pro den e votacion, nos tin e bewijs, y sr. Howell tambe ta bisa cu el a vota. Esey pa mi no ta e problema. Ta griffier ta nota, no ta ami ta nota of marka, kiermen e Griffier a marka di su mes”, sr. Thijsen a expresa. E presidente di parlamento a duna henter un splicacion unda ta remarka cu minister Lopez-Tromp ta purba hinca su persona den un problema, acusando su persona y tambe hinca e griffier cu ta complice den e acto penal aki. “Den su declaracion [Lopez-Tromp] el a pone instituto di parlamento den un problema, pasobra e ta mustra cu instituto di parlamento kiden ta fechoria ta pasa, actonan penal ta pasa. E ta un acusacion fuerte, vooral cu ta trata presidente di Staten”, sr. Thijsen ta bisa.