NEW YORK/CIUDAD DI PANAMA- Presidente di Panama, Juan Carlos Varela, diahuebs a probecha su ultimo intervencion den e Asamblea General di ONU pa haci un yamado pa resolve e crisis cu Venezuela y Nicaragua ta pasando aden. Tambe pa traha un caminda cu lo por conduci na e desblokeo di e isla di Cuba.
Varela, cu a habri e di dos rond di e debate di Nivel Halto di e Asamblea, a haci un extenso repaso na su obra di gobierno den e ultimo añanan. El a elabora tambe basta extenso ariba e problemanan migratorio cu ta afecta su pais y Latinoamerica.
“Lesnan siña den e ultimo crisis migratorio ta obliga nos di recorda e yamada energico na gobierno di Venezolano pa recupera e dialogo y den democracia haya e paz social cu lo evita cu e migracion masivo, continua, como tambe e crisis humanitario”, el a afirma ante e aplauso di un parti di e asistentenan na e Asamblea.