PANAMA CITY, Panama – E presidente di Panama, Juan Carlos Varela, a ricibi “donacion” di e compania di construccion Brasileño, Odebrecht, Ramon Fonseca Mora, exminister consehero di e mandatario y socio di e bufete Mossack Fonseca, a sigura awe. Mossack Fonseca, tabata e epicentro di e escandalo conoci como Panama Papers.
“El a bisami cu el a acepta donacionnan di Odebrecht, pasobra e no por pleita cu tur hende,” Fonseca Mora a declara na periodistanan prome cu el a bay Ministerio Publico unda cu el a wordo rekeri pa su supuesto implicacion den e caso di corupcion Brasileño, conoci como “Lava Jato.”
Ora di a wordo cuestiona di nobo riba e supuesto “donacionnan” di e constructora Brasileño entrega na e presidente di Panama, Fonseca Mora a responde: “Esey el a bisami.”
E secretario di Comunicacion di Presidencia di Panama, Manuel Dominguez, a nenga di duna un reaccion inmediato na Efe y a sigura cu den e proximo oranan lo bay tin un respuesta oficial di e Gobierno dilanti e insinuacionnan.
Fonseca Mora a desempeña como minister consehero di Varela y e presidente di e gobernante Partido Panameñista te cu Maart di 2016, ora cu el a pidi un “licencia” pa defende su mes di e acusacionnan deriva di e filtracionnan di documento di e despacho cu el a funda mas di cuater decada atras cu Jurgen Mossack y cu ta duna cuenta di e creacion di miles di sociedadnan anonimo rond mundo.
Fuente: El Espectador