Siman pasa sindicato FTA a recorda cu 57 aña nan a wordo funda. Un sindicato cu a surgi na momento cu un grupo di Arubiano a dicidi di lanta e organisacion basa riba un necesidad pa representa e trahadonan. E fecha aki a wordo recorda den forma trankil. Esaki Hubert Dirksz, presidente di FTA a bisa den un declaracion.
FTA awendia ta gradici na tur esnan cu a forma parti di e movecion aki na su fundacion y esnan cu pa añanan largo a duna nan aporte pa e sindicato por ta exitoso y cu e aña’ki a celebra 57 aña. “Sindicato no ta un tienda unda cu por yega cumpra un product sin mas. Sindicalismo ta un necesidad socio-politico hopi importnate cu e trahado mester ta consciente pa lanta para y lucha pa nan progreso. Esey FTA a bin ta haci den tur sector. Sigur den sector hotelero FTA a impacta desde cu el a drenta e sector ey.”
Dirksz a bisa cu nan ta hopi satisfeco. Tin hopi ley cu mester a bringa pa haci cambio y bringa pa logra hopi contracto colectivo, cu ainda no ta valido den tur sector. Aruba ta forma parti di Caribe Hulandes. Pero e lucha di 30 di mei na Corsou tabatin su impacto positivo riba cambionan di ley cu a yuda Aruba tambe. “Sin lucha bo no ta yega. No solamente un sindicato mester lucha pero sindicatonan mester uni y para hunto pa logra e cambionan desea.”
Loke cu nan ta spera pa hopi decada caba ta Ley di ARBO cu a yega Departamento Huridico. E ta algo cu ta garantisa siguridad na pia di trabou. Mester tin mas control na pia di trabou y impone boet na esnan cu ta viola reglanan di trabou. Kisas na e crisis di pandemia, otro cosnan a haya prioridad. ARBO ta tuma su tempo pero ta momento pa e cana su caminda mas lihe.
FTA di awendia ta hopi gradici pa e lucha hiba na e inicio, cu a percura cu awendia trahadonan tin hopi derecho.