Sr. Glenn Thode, Presidente di Conseho Nacional Electoral ta splica di e pasonan cu a tuma na edificio di Censo pa por nombra e 8 Parlamentarionan nobo.
Sra. Formado a saca informacion afo, publicamente cu nan a yega na acuerdo cu otro, e tres partidonan. Y tambe el a bisa cu nan a yega na un acuerdo, e personanan cu lo haya puesto di minister.
Pa e proceso ey, na e nomber di e personanan cu a wordo menciona, actualmente ta miembro di parlamento. Bou di nos Constitucion, nos tin un structura cu ta wordo yama ‘Dualismo’. Den ‘dualismo’, representacion di pueblo y gobierno y ministernan ta ehecuta maneho den cuadronan legal y presupuesto cu Parlamento ta determina. Pa e motibo di ‘dualismo’ tin un separacion entre e poder di Parlamento y Ehecutivo (Ministerraad) y bo no por ta miembro di tur dos. Pa un persona bira minister, e no por ta na mesun momento Parlamentario.
E hendenan cu ta bay wordo nombra como minister, lo entrega nan asiento di Parlamento y e ora ey, Conseho Electoral tin cu repasa e resultadonan di eleccion y mira si en berdad, un persona cu aworaki tin un asiento den Parlamento, tuma su retiro di e asiento aki, segun e resultadonan di eleccion di 22 September, ken ta proximo ariba lista cu mester wordo asigna e posicion como persona eligi.
E ora mester haci e mesun proceso manera despues di eleccion, tin cu repasa atrobe pa esunnan cu ta e proximo den liña. Conseho Electoral mester a prepara e documentonan diahuebs y pasa door di henter e proceso cu tabata similar na e momento cu eleccion a caba di tuma luga.
E persona en cuestion lo yena un papel y diabierna mainta ta huramenta. E papelnan en cuestion ta wordo manda Staten, caminda nan lo tin un reunion, cu ta onderzoek di e geloofsbrieven, pa wak si e ta cuadra cu nos Constitucion, nos Kiesverordering, si e personanan en berdad a haya e cantidad di voto, cu tabata ariba lista pa nan haya apuntacion di asiento y e ora nan por tuma luga den Staten. For di eynan e trabao di goberna ta sigui, cu miembronan nobo den Parlamento y miembronan nobo den gobierno.
Siguientemente un lista di e nomber di e ocho personanan cu lo drenta como miembro di parlamento, diabierna 17 di November, 2017:
– Sr. mr. Juan E. Thijsen (MEP)
– Sra. Setty Christiaans- Yarzagaray (MEP)
– Sra. Sue Ann Ras (MEP)
– Sra. Shailiny Tromp – Lee (MEP)
– Sr. Jan H. Croes (MEP)
– Sr. Edgard Vrolijk (MEP)
– Sr. Alan Howell (POR)
– Sra. drs. Marisol Lopez Tromp (POR)