WASHINGTON D.C., Merca – Ta algo di un misterio e paradero di e Presidente di e Comite di Inteligencia, Devin Nunes, riba e dia prome cu su anuncio diaranson ultimo, cu el a mira e informacion sugiriendo cu comunicacion di e presidente electo Donald Trump y su conseheronan por a wordo intercepta.
E Republicano di California a confirma na CNN den un entrevista na telefon dialuna, cu e tabata na Cas Blanco riba e dia ey, pero el a bisa cu no den Cas Blanco mes. (Otro edificionan, incluyendo e edificio di oficinanan ehecutivo Eisenhower, cu ta riba e mesun tereno)
Nunes a bay na e edificio pasobra e tabata tin mester di un area sigur pa tira un bista riba e informacion, el a conta CNN. El a bisa cu e no ta kere e presidente ni ningun di e team di su “West Wing” sa cu e tabata eynan y Cas Blanco a bisa dialuna cu nan a haya sa di e bishita di Nunes atrabes di reportahenan den media y a dirigi cualkier pregunta na e congresista.
Nunes a bisa cu e ta eynan pa reunionnan adicional “pa confirma loke mi sa caba” pero a bisa cu e no lo comenta mas despues pa asina “no compromete fuente y metodonan.”
Un gobierno oficial a bisa cu Nunes a wordo mira diahuebs anochi na e oficinanan di e Conseho di Siguridad Nacional di e edificio Eisenhower, cual, otro cu e Situation Room di Cas Blanco, ta e area principal di e compleho pa mira informacionnan clasifica den un camber sigur. E oficial a bisa Nunes a yega y a wordo laga su so.
E exposicion di Nunes cu e propio comunicacionnan di Trump lo por a wordo intercepta “incidentalmente” door di spionnan domestico – y e decision pa papia uc prensa y Cas Blanco prome cu informa e Democtratanan riba e Comite di Inteligencia – a enfurece e Democratanan y a haci cu e mester a disculpa na su coleganan di panel.
Trump ta bisa cu e ta sinti “algo” vindica door di e hayasgonan di Nunes.
Algun Democrata a bisa cu e accionnan di Nunes ta nifica cu e no por conduci un investigacion imparcial den un laso potencial Trump-Rusia, aunke e House Speaker, Paul Ryan a bisa dialuna cu e tin “pleno confiansa” cu Nunes por supervisa esaki.
Parlamentario Eric Swalwell, un Democrata di California, tambe a sinta riba e Comite di Inteligencia, a acusa Cas Blanco dialuna, di a “stroba” e investigacion di e panel y a yama pa un comision independiente pa revisa e asunto.
Fuente: CNN