PACARAIMA, Brazil- President di Brasil, Michel Temer, a ordena e envio di tropanan diadomingo na e ciudad fronteriso di Pacaraima, den e estado di Roraima pa detene e enfrentamentonan entre residente – y inmigrantenan Venezolano, cu a haya nan obliga di bandona e pais despues di a wordo ataca.
Segun AFP, despues di a manda soldaatnan na e frontera cu Venezuela, e mandatario a convoca un reunion di emergencia cu su gabinete pa trata e situacion. Na Pacaraima, un total di 120 militar y 36 boluntario a wordo desplega.
E medida aki ta bin despues di cu diasabra, decenas di Brazilero a ataca e campamentonan improvisa di migrantenan Venezolano na Pacaraima debi cu un comerciante local a wordo asalta y a resulta herida den un incidente atribui na un grupo di Venezolano.
Habitantenan di e ciudad Brasilero a cende pertenencianan di e inmigrantenan na candela. Esaki a obliga e Venezolanonan na bandona Brazil y bay bek nan pais. Ta calcula cu mas di 1200 migrante a bay bek nan pais.
Presidencia di Brazil a anuncia den un comunicado cu gobierno “ta comprometi cu e proteccion di e integridad di e Brasilero y Venezolanonan”. Di su banda, Canciyeria di Venezuela a urgi Brazil pa garantisa e siguridad di famianan emigrante.