Director di Archivo Nacional, Sr. Raymond Hernandez, ta elabora tocante e presentacion cu el a duna na un evento di Unesco, caminda el a papia di con nan por preserva nos herencia cultural tangible na momento di un calamidad.
Sr. Hernandez ta cuminsa na splica cu el a wordo invita pa duna un presentacion cortico na un evento di Unesco tocante con institutonan encarga cu e herencia cultural tangible di Aruba por proteha esaki den e momento di un calamidad. Hopi biaha cu tin anuncio di calamidadnan, e institutonan ta tuma cierto precaucionnan pa evita daño na e coleccionnan. Pero hopi biaha nan no ta realisa kico ta e grado di un calamidad y tampoco nan ta prepara pa enfrenta e calamidad ora e pasa. Si un instituto di cultura ricibi dañonan, nan mester sali wak kico tur a wordo daña cu nan por purba na rescata bek. Sr. Hernandez ta comenta cu e tabata na Sint Maarten relaciona cu e mesun topico aki na unda particularmente e islanan di Caribe ariba a haya hopi daño. A cuminsa cu un preparacion den Caribe pa conscientisa e institutonan con pa salvaguardia mas tanto posibel nan coleccionnan. E idea ta pa cuminsa di antemano pa wak con nan por proteha nan coleccionnan pa evita daño na nan.
Sr. Hernandez ta remarca cu e parti mas fastioso cu tin na Aruba ta e hecho cu e institutonan encarga cu e herencia cultural no tin un caminda pa proteha e coleccionnan contra cualkier tipo di calamidad. E diferente institutonan mester por bini hunto y yuda otro den e evento di un calamidad.