Biblioteca Nacional, Cas di Cultura, Instituto Pedagogico Arubano, Departamento di Cultura y Mirto Laclé ta sumamente orguyoso di por presenta e cineasta, productor di documentario Cindy Kerseborn cu a produci e siguiente documentarionan cu lo keda presenta: -Documentario Astrid Roemer: conocido autor, poeta Surnam. E documentario aki ‘De wereld heeft gezicht verloren’ ta mira e trabou di skirbimento di Astrid Roemer di cerca y con importante skirbimento ta pa su persona. Riba 19 di Mei 2016 Astrid Roemer a ricibi e premio P.C.Hooft-prijs na Hulanda pa henter su obra, cu ta cuantitativo y hopi interesante. Astrid Roemer ta e prome autor femenino di origen caribeño cu ta ricibi e tan prestigioso premio literario P.C.Hooft-prijs voor Letterkunde. E ta considera su mes un autor Surnameo-Hulandes.
Durante 15 aña Astrid Roemer a cana cu su mascota, un pushi, laptop y muchila. Ningun hende tabata conoce su paradero. El a abstene su mes di mundo completamente. Despues di un odisea intensivo Cindy Kerseborn ta logra localis’e y combersa cu ne. Aunke, na cierto ocasion, contra su gusto. E persona carismatico Roemer ta laga mira con vulnerabel un persona por ta.
Un cita hopi uza pa Astrid Roemer ta: ‘Skirbi ta e ciencia di lo intimo’.
-Documentario Edgar Cairo, conocido autor, poeta y artista-pintor Surnameo. E documentario “Ik ga dood om jullie hoofd” ta trata bida, obra literario y pinturanan di Edgar Cairo kende a fayece na 2000. Durante di su bida cortico Edgar a skirbi como 40 obra den casi tur genero literario. Den su obra ta resalta hopi contradicción cu ta domina e relacion entre migrante, paisnan colonisa (i.c. Surnam) y e hulandesnan estableci: color, sexo y constantemente e herencia colonial no-elabora. E obra aki el a skirbi den un version personal di e idioma Surinam-Hulandes, y tambe na Sranantongo cu te na e momentonan ey tabata existi solamente como un idioma papia, como idioma di comunicacion. Ademas el a skirbi un obra poetico inmenso, cu el a sa di vocifera cu un forma di sonido inigualabel. Tambe Edgar Cairo a produci como 200 pintura den cual el a sa di crea imagennan profundo na un manera propio.
-Documentario Frank Martinus Arion: de man, de vrouw, de poëzie: E documentario ta haci referencia na e escritor, poeta y lingüista Frank Martinus Arion di Corsou, escritor conoci pa su buki Dubbelspel. E pelicula ta trata e tema central di su obra, for di punto di bista di e cineasta, productor di documentario Cindy Kerseborn.
Cindy Kerseborn lo ta presente pa comparti y dialoga cu e publico.
Pueblo di Aruba, maestronan di idioma, studiantenan di Scol Secundario ta keda cordialmente invita pa asisti na e dos anochinan interesante aki: diamars, 13 di Sept., na Biblioteca Nacional Aruba y diaranson, 14 di Sept., na Cas di Cultura. Entrada ta gratis.
Pa informacion adicional tuma contacto cu organisado Mirto Laclé, tel 7402044.