Arubadag: esaki ta e manifestacion cultural mas grandi cu Arubianonan residencia na Hulanda ta spera pe anualmente. E ta hopi gusta tambe bou di Curasoleñonan, Boneriano y Isla Ariba. Riba rednan social por a mira caba e poster cu a sali pe siguiente Arubadag, cual ta conoce varios cambio, entre cual e venue. Minister Plenipotenciario na Hulanda, Sr. Guilfred Besaril, ta elabora ariba tur e cambionan aki
Recientemente Grupo di Betico a celebra nan 50 aña den mundo farandulero. Segun Minister Besaril, un grupo cu ta hopi pidi actualmente na Hulanda, ta Grupo di Betico, pa e presenta durante Arubadag. Mester recorda cu Arubadag ta un manifestacion cultural cu ta wordo teni tur aña na Hulanda y ya caba tin basta discusion tumando luga pa cu e celebracion di esaki, y e gastonan cu esaki ta trece cun’e pa bay presenta na Hulanda. Sr. Besaril a splica cu tin un gobierno cu por pensa cu si ta papia di Arubadag, e durabilidad di un evento cu awendia ta plataforma pa nos artistanan local. Unabes cu nan presenta nan mes na Arubadag, portanan ta habri pa nan na Europa. Mundo a bira chikito. Mescos cu na Aruba ta graba un video pone ariba rednan social, tur hende rond mundo tambe ta haci’e. Dus, kico adicional por haci pa nos artistanan, hendenan cu ta hiba nos cultura na otro nivel, por habri porta pa nan yega camindanan grandi. Esey ta loke Arubadag lo bira.
Pa loke ta e cambio di e luga pa tene e celebracion, Sr. Besaril a splica cu loke e por a identifica aña pasa cu el a bira minister, tabata ta cu tabata tin un grupo grandi di promotor cu tabata warda, pa pais Aruba paga pasashi, estadia, per diem (zakgeld durante estadia), pa haci e inversion aki, y unabes cu nos artistanan yega Hulanda, tur di nan kier hiba nan Groningen, Rotterdam, dus bay toca otro caminda y gana placa ariba e pagado di belasting na Aruba.
Arubadag ta un actividad cultural, cu e artistanan cu ta bayendo Hulanda ta un premio, pasobra cu a haci algo den e aña anterior. Durante 2018 a wak cual ta e artista cu a haci un prestacion particular, y esaki ta wordo premia pa bin Hulanda. E no ta mara na tradicion, e ta loke ta mira y kico tambe ta e peticion na Hulanda. P.e. un di e discusionnan cu tabata tin ta cu a bisa cu Arubadag ta pa tur artista, cu tur artista ta bay Hulanda pero ta ripiti Grupo di Betico.
Mester bisa cu e presion ariba Arubahuis ta grandi, tin tantisimo peticion cu a drenta pa trece grupo di Betico. Y si ta peticion popular pa trece grupo di Betico, e ora Grupo di Betico ta ripiti. Ta e Arubianonan biba na Hulanda, ta paga pa bay wak un Grupo di Betico. E ora como organisado, tin cu scucha e publico. Nan a pidi pa Grupo di Betico, e no tin otro opcion. Si a bisa cu ta ripiti Grupo di Betico, pero pa otro aña ta duna otro gruponan tipico un oportunidad. Dus, minister Besaril ta haci un yamado na gruponan tipico local, pa no keda solamente produci pa 18 di maart of temporada di fin di aña, pero sigui produci. Nos musica tipico ta algo cultural, cu mester wordo inculca durante e generacionnan cu ta bin. Y cu hopi cariño ta trece nan Hulanda como premacion pa nan esfuerso. Ta tende yen di nomber, pero si haya nan mes riba internet, ta canticanan di algun aña bieu. Ta importante pa nos gruponan tipico ta activo constantemente, pa asina nan tambe por haya exposure riba tarimanan internacional.
Pa loke ta aspecto general, e peticion abrumador cu a ricibi na Hulanda, di parti e personanan cu ta esunnan cu ta paga e entrada na Hulanda.