Riba 10 di December mundo henter ta conmemora e dia Internacional di Derecho Humano. Aki na Aruba studiantenan di Universidad di Aruba cu ta haciendo nan prome aña den e ramo di Trabou Social na e bachelor program “Social Work & Development”, tabatin e placer pa haya un sesion special tocante Derecho Humano cu e tema di e aña aki: Stand up for someone’s rights today!
E presentacion a ser duna pa sra. mr. Olivia Croes y sr. Anthony Lee di Comision Nacional Derecho Humano y tambe srta. Ghislaine Nicolaas di Oficina di Minister Presidente trahando riba e”Sustainable Development Goals”.
E studiantenan a ricibi informacion extenso di e Tratadonan Internacional y e sistema di supervision di Nacionnan Uni. Alavez a splica di e cumplimento na nivel nacional y e tareanan di e Comision Nacional di Derecho Humano.
A elabora tambe riba e 17 “Sustainable Development Goals” cu ta riba e agenda global y nan conexion cu Derecho Humano. Paisnan rond di mundo a compromete nan mes pa traha y logra e metanan aki pa aña 2030. A mustra riba e hecho cu e metanan sostenibel y Derecho Humano ta interconecta. Aki na Aruba tambe ta traha na logra e metanan aki riba nivel macro, meso y micro door di diferente actor. Por tuma nota di iniciativanan di parti di gobierno, pero sigur tambe di e sociedad civil.
E mensahe principal pa e studiantenan den e sesion aki tabata e papel cu nan tin como futuro trahado social y pa nan como profesional ta bon equipa na pia di trabou cu conocimento y informacion pa por sali na defensa y ayudo di esnan cu ta acudi cerca nan y di e forma aki yuda promove derecho humano di esnan cerca di nan.