Siman pasa den un sala completamente yen na Renassaince Convention Center pa e homenahe na Sr. Rudy Plaate y Norman Moron, e publico por a gosa for di comienso te final cu diferente artista local tocando y cantando composicionnan di Rudy Plaate.
Nos a scucha Robert Thiel y su grupo hunto cu Jeon cantanto musica di Rudy Plaate, tambe Etty Toppenberg cu su grupo, tambe un bon presentacion di Happy Hour Band, Rachel Kraaijvanger y pa cera e anochi Papito Rafael cu su Biba Lekker Band cu a pone un bon ambiente.
Entre esakinan sigur un grupo cu a resalta durante e anochi aki cu su presentacion tabata e grupo Melodia cu a presenta cu un potpouri di tempo di Perlitas y despues algun potpouri di otro cancionnan di Rudy Plaate cu a zona hopi bon mes. Despues Melodia a compaña Grupo Melange bou direccion di Maybeline Arends-Croes cu sigur a duna e publico un show di kita sombre.
E presentacion di Melodia y Melange a sorprende e publico cu nan cancionnan bon hinca den otro y bunita presenta cu hasta esnan cu a forma parti di e organisacion y tambe esnan cu a ricibi e homenahe a keda sorprendi.
Durante e presentacion di Melodia por a tuma nota di Sr. Rudy Plaate y Norman Moron gosando di e piezanan aki caminda cu e emocion a pone Sr. Rudy Plaate subi escenario y gradici e grupo aki dilanti tur e publico y duna e grupo aki autorisacion pa graba tur su composicionnan sin ningun compromiso of exigencia.
Esaki sigur tabata algo grandi pa e grupo aki y a ricibi un aplauso grandi di parti esnan presente cu a keda masha contento cu e aprecio cu nos talentonan hoben ta ricibi for di artistanan di caliber asina.
Mientrastanto ya nos a haya e confirmacion di e grupo Melodia cu ta bay cuminsa prepara pa un produccion dedica completamente na e homenahe aki cu varios di e cancionnan cu a wordo presenta e anochi aki hunto cu otro artistanan local. Esaki sigur lo bira un produccion cu hopi fanatico di e musica di Rudy Plaate lo desea pa tin den nan coleccion.
Grupo Melodia pa varios aña caba ta hopi activo den diferente festival y tambe sigur e temporada di fin di aña.
Na varios radio emisora nos por a scucha un cancion promocional cu e grupo aki a caba di lansa pa e temporada di fin di aña sperando nan produccion cu lo sali den e dianan nos dilanti cu varios tema musical pa e dushi temporada aki.
Melodia sigur ta un grupo cu ya nos no por falta mas pa e temporada aki cu nan dushi musica unico y nan repertorio tanto varia.
For di e leader di grupo nos a compronde cu nan lo ta presentando tambe den e ultimo concierto Dominical pa 2016 na Biblioteca Nacional cu lo ta den e luna di November y kisas lo por ripiti algun di e piezanan di Rudy Plaate.
Nos kier a manda un pabien pa grupo Melodia y deseanan tur clase di exito den e temporada aki y tambe cu nan proyuectonan pa futuro.