Diahuebs dia 5 di Januari venidero Sr. J. A. Boekhoudt lo presenta su credencialnan como Gobernador di Aruba nobo durante un ceremonia solemne den sala di Parlamento den presencia di Aruba su respresentantenan legislativo y ehecutivo y demas invitadonan representando diferente instancia di gobierno y di comunidad. Di e forma aki Su Excelencia sr. Gobernador lo cumpli cu su deber manera esaki ta stipula den articulo 3 di Reglamento di Gobernador y ta asumi e encargo di cabes di Gobierno di Aruba y representante di Reino Hulandes pa e siguiente 6 añanan.
Despues di e ceremonia solemne den sala di Parlamento Su Excelencia Sr. Gobernador lo haci su prome inspeccion di e cuerpo di Marina Real staciona aki na Aruba. Sigur un acto protocolario di importancia dunando realse na nos sistema democratico digno pa wordo presencia pa cual motibo Parlamento di Aruba ta extende un invitacion na pueblo di Aruba en general pa bin presencia esaki di e manera aki duna un cordial “Bon Bini” na nos di cuater Gobernador.