Diamars awor, dia 7 di maart, di 5or pa 7or di anochi sr. Vi Frank jr. hunto cu un grupo di cursista ta presenta un buki titula: MARACA: un sentimento Caribense produci den diferente storia y poesianan local den nos Sala di actividad di Biblioteca Nacional Aruba.
E publicacion ta e resultado di e curso di skirbimento cu sr. Vi Frank jr. a duna na november 2021. Di e 11 participante, 7 a entrega un obra, sea Prosa of Poesia, pa hunto cu Vi Frank jr. produci un buki. E cursistanan a haya e curso exitoso y tabatin e deseo pa documenta e storianan, prosa y poesia pa medio di un buki. Como deadline a fiha e luna di juni 2022 pa asina duna tur tempo pa traha y entrega nan material. Tawatin den nan, algun cu nunca a skirbi un obra, pesey mester a duna tempo. Despues di varios rondo di edita, na november 2022 e buki a keda cla.
E autor/poetanan cu a contribui na e ‘Maraca’ ta Glenda Tromp, Adelaida Ponson, Noris van Lis-Donata, Dominico Werleman, Ariana Koolman, Elienne Ratiaga y Ida Croes. Docente Vi Frank jr.
Publico ta bon bini pa forma parti di e presentacion di ‘Maraca’ diamars awor 5or.
Noris van Lis-Donata
Noris van Lis-Donata a nace na Aruba. Como mucha e tabata gusta pinta, balia y lesa buki. Ora luna ta yen, su mama tabata sinta pafo cu tur e rumannan pa nan conta storia. Despues di su estudio pa analista na Hulanda, el a sigui cu estudio di ley. Na Dept. di Enseñansa, e tabata co-autor di un buki tocante posicion huridico pa maestronan. Na 1994, el a drenta politica y a logra bira Parlamentario. Noris semper ta cla pa yuda muchanan keda riba bon caminda den bida. Na 2012 el a publica e buki ‘Ban Bisa Danki’ y despues e buki ‘Nos Gran Amigo’. Noris ta gusta storia real cu un mensahe educativo, y semper ta cla pa siña idea nobo.
Ariana M. Koolman – Chirino
Ariana M. Koolman-Chirino (1969), nomber artistico Lady Ari, ta un poeta, autor y artista. E ta e autor di e coleccion di poesia titula “Mi Bahul di Poema”, y tambe el a yega di skirbi diferente storia cortico cu ta wordo uza na scol y cursonan duna door di ‘Mi Instituto Papiamento’. Tambe el a sigui curso ‘fiction y non fiction writing’ pa asina por skirbi storianan interesante pa deleita e lectornan. Como autor e ta activo riba diferente tereno, manera pintamento, obra di man, musica, teatro y mas. Den su bida diario e autor ta un teamleader den e mundo bancario. E ta un leader scout pa 35 aña y facilitado di curso.
Glenda M. Tromp – Geerman
Glenda M. Tromp-Geerman, naci na Aruba na 1950, semper tawatin pasion pa historia, musica, arte, moda y yerbanan medicinal. Glenda ta un persona cu ta kere firmemente den traha duro y esaki ta un motivacion cu el a keda cu ne pa e sigui siña mas.
Den transcurso di añanan, Glenda a siña traha escultura di klei cu a gana premionan local y internacional. El a skirbi hopi poema y storia y a duna lectura na hopi scol na Aruba. Glenda ta e prome y unico hende muhe cu a traha un Caha di Orgel; e yama Désiree. Glenda gusta siña y esaki ta kico a lag’e tuma e oportunidad pa pone algo extra riba su portfolio y esaki a lag’e skirbi su prome storia di fantasia.
Dominico Werleman
Dominico Th. Werleman, naci na 1956, ta un Ing. Werktuigbouwkunde, y empleado publico pa mas di 38 aña. Tabata miembro di JCI Aruba y actualmente ta den Directiva di JCI Senators of Aruba.
Desde comienso di aña 2000 e ta skirbi storianan cortico y poesia. Ta trata aki di storianan di ficcion y basa riba experiencianan personal. Un di su otro actividadnan ta diseña y traha fli.
Vivienno Frank Jr.
Vivienno ‘Vi’ Frank Jr. (1959), desde hoben semper tabata interesa den skirbi storia. Su genero faborito ta e.o. Gothic Novels y Cosmic Horror. Na 2020, el a haci su debut como autor di e prome thriller den idioma Papiamento, titula “Damnatio ad Bestias” (Condena n’e Bestianan). E mes aña, el a publica un coleccion di storia cortico na Ingles den e genero di Cosmic Horror, titula “Outpost Alto Vista”. Banda di su otro pasion y actividadnan manera e.o. literatura, pelicula, magia cu carta, biyar, musica, y weganan strategico di mesa, el a studia e.o. Bedrijfskunde na Hulanda, y tin hopi aña den e ramo di Management Consulting.
Elliënne Riatiga
Elliënne “Elly” Riatiga (Aruba, 8 juni 1998), docente di Papiamento di profesion, desde scol basico a cuminsa skirbi, cual te dia di awe, ta su forma mas fuerte di expresa su mes. Su prome publicacion na 2021 el a dedica na tur e sernan femenino fuerte y resiliente. Na aña 2022 el a participa pa prome biaha den e di 15 competencia di Haiku Ellis Juliana, unda dos di su obranan a logra sali den e preseleccion den e categoria di adulto bou di su nomber artistico “Elly V”. Tambe el a fungi como miembro di hurado pa e competencia literario Arte di Palabra. Elly ta considera su mes un persona multifacetico. Su mensahe final: “Tur cos den bida ta pasa pa un motibo, pero nunca rindi! Lucha te final, pasobra cu amor, dedicacion, pasenshi y perse- verancia, bo por logra tur locual bo propone den bida.”
Ida Croes
Ida Croes (1946), despues di su MULO diploma a sigui varios curso di secretaria te cu el a haya e funcion di secretaria profesional, trahando pa hopi aña pa diferente instituto manera sindicato, banco, hotel y notario. Desde su infancia semper el a desea di skirbi storia y poesia, pero nunca a pone su mes pa haci esaki. Despues di a atende e curso di Skirbimento Creativo na biblioteca, duna door di sr. Vivienno Frank na november 2021, el a dedica su mes pa haci un comienso oficial cu skirbimento y publicacion di su obranan. Ida semper a gusta arte, lesa, baila y actua, y a yuda den varios produccion di Cas di Cultura. Ida su lema ta: “keda semper den movecion, fisicamente y cu bo mente.”
Adelaida Ponson – Arends
Actualmente pensiona despues di un bida trahando diferente ofishi, na Banco, na diferente scol como docente di Ingles y Spaño, y tambe comerciante pa 20 aña cu su propio negoshi. Den su bida social, Adelaida ta hopi activo p.e. den sector di deporte (tennis), o den Women’s Club y na scol den oudercommissie. Recien casa, el a biba 11 aña na Corsou, caminda tur tres su yiunan a nace. Actualmente, cu tres yiu adulto y awo cu tres nieto, e ta disfruta di su bida cu su casa, cumpliendo 55 aña hunto. Adelaida ta amante di landamento na beach, pintamento, tocamento y tambe skirbimento de bes en cuando. Su lema; “Bida ta dushi y mare nos por sigui disfruta asina riba nos dushi isla!”
