Esunnan cu den e dianan aki ta pasa banda di Grot di Lourdes na Seroe Preto San Nicolas por a tuma nota cu tin basta movecion na e luga.
Ta asina cu e Comision ” Grot di Lourdes ” hunto cu pastoor Raffy di Parokia di San Nicolas, ta trahando duro pa asina prepara e facilidadnan pa e gran celebracion pa recorda 60 aña e inauguracion di e grot.
Esaki lo tuma luga Dialuna 11 di Februari, 2019. For di dia 2 di Februari caba e actividadnan lo start sali cu un nobena na honor di La Birgen di Lourdes na misa Sta. Theresita.E celebracion mes di “60 aña di Grot di Lourdes Aruba ” lo ta Dialuna 11 di Februari, 2019 cu lo cuminsa cu un procesion saliendo for di misa Sta. Theresita pa 5.30 pm. E procesion lo sali for di misa Santa Teresita na San Nicolas drenta e caminda di Seroe Preto y sigui straight te na Grot di Lourdes, cantando y resando e santo rosario na caminda.
Pa 6.30 di atardi lo cuminsa un santo sacrificio di misa na Grot di Lourdes unda diferente pastoornan di Aruba a keda invita pa ta presente. Despues di misa e pastoornan presente lo ofrece e sacramento di enfermo na esunnan cu ta desea esey, pues henter pueblo di Aruba ta keda cordialmente invita pa e gran celebracion aki Dialuna 11 di februari, 2019.